曾拍50套三級片為父籌醫藥費 前艷星顏仟汶2套劇同時出街

收視唔算高嘅香港開電視近期轉陣，除咗有《東張西望》式嘅資訊節目《一線搜查》，亦效法TVB黃金時段排陣播2套劇。呢期播出嘅《黑金風暴》同《獅子山下的故事》，就見到千禧年前後拍過唔少三級片嘅顏仟汶。而家嘅佢收起性感洗盡鉛華，原來多年來都有唔少辛酸事。

51歲嘅顏仟汶係TVB 1989年藝訓班畢業生，同屆同學有林家楝、甄子丹、黃德斌同黎芷珊等等，陣容強勁。喺TVB時佢以藝名亦羚演出，1996年離巢，到1998年轉投亞視，但係唔夠一年就因為一輯性感照而被亞視解約。

之後顏仟汶被王晶同李兆基睇中，邀請佢拍三級片。顏仟汶曾表示當時片酬數字好吸引，加上父親患癌、細佬妹年紀細等家境原因，於是放手一搏豁出去。自此顏仟汶幾年間拍咗50套左右三級片，雖然早幾年佢表示即使再拍都冇問題，但係有得揀的話會寧願讀好書唔入行。拍完一大堆脫戲之後，顏仟汶消失幕前一段時間，近2年先再復出，今年初TVB播嘅《家族榮耀》入面，顏仟汶飾演李彩樺生母嘅好友芳姨。而喺《黑金風暴》同《獅子山下的故事》，顏仟汶分別飾演圍村村民同埋海味店太子女，造型截然不同。

感情生活方面，顏仟汶喺亞視期間同杜汶澤拍過拖，分手之後杜汶澤同咗田蕊妮一齊。之後顏仟汶結識圈外人阿Lo，拍拖結婚仲一齊搞餐廳，但喺2016年離婚收場。雜婚後顏仟汶被指同已婚契哥詹秉熙有親密來往，搞到絕交收場。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！