曾比特IG被hack照片全刪光 網民揣測想洗底而自導自演：之前周柏豪又係咁

曾比特（Mike）因參加TVB與內地平台合作嘅歌唱節目《聲生不息》而人氣急升，成功獲得一班內地支持者。日前，曾比特IG突然清空，其後佢出PO表示被入侵，同時佢又開埋小紅書，引起香港網民唔少揣測，仲指係「周柏豪2.0」。

曾比特喺《聲生不息》首集獻唱《初戀》後，令佢微博大增近10萬粉絲，同時登上微博熱搜榜；不過，基於曾比特出身自ViuTV《全民造星II》，就被香港網民指佢唔單止出現喺TVB，更返內地搵人仔，直斥曾比特「食兩家茶禮」。另外，曾比特IG突然清空及開小紅書帳號呢兩件事亦令香港網民懷疑會唔會係曾比特自己想洗底；事源係喺曾比特新歌《奔跑吧!》推出前幾天，佢IG嘅相全部無晒，後來曾比特出PO表示：「被hack，拎返依個account，不過冇哂d post」；網民留言：「肯定係洗底全程投入大陸懷抱啦」、「個黑客咪佢自己囉，正常一個黑客要搞破壞點解唔係用佢個account出fake news釣魚或者清晒佢啲follower而係純粹走去del過往自己出嗰啲po?」、「之前牙醫（許廷鏗）俾人hack, 都拎得返啲舊posts」、「半日就拎得返，你唔好以為大家唔知ig既效率係幾低架啦」、「諗起之前周柏豪又係咁，不過佢係自己delete曬再奶共」等等。

網民又指曾比特係咪參考周柏豪，事關周柏豪2019年曾喺IG發文叫大家登記做選民舉動令其流失大量內地粉絲，單日蒸發約3萬追蹤者，直至一個月後，周柏豪將自己IG 7千多個帖文刪至千多個帖文，令網民懷疑此舉動係想洗底；所以網民都猜測曾比特IG被Hack一事嘅真假，到底係咪自導自演。而前晚（1日）《聲生不息》播出一集，曾比特與林子祥合唱《單車》，真情流露唱出父子分離嘅傷感，再度獲得唔少內地網民激讚；不過，部分香港網民依然唔支持：「日後唔好返落嚟搵食就得」、「佢既然選擇咗，咁祝佢搵錢快樂」、「佢小紅書都開埋，應該無諗住返轉頭」、「返上去搵人仔啦」、「扮咩有hacker 算X數啦」、「即刻將奔跑吧出國語版」等等；不過都有部分網民力撐，表示可能曾比特自己都無得揀：「俾公司迫姐都係」、「其實佢係咪真係想去大灣區歌手？佢間公司係環球有咩say 唔通你叫佢自己賠違約金咩」、「返大陸未必係佢想，環球大把歌手都上過去」、「香港人係對佢冇feel，留係香港做乜」、「香港樂壇容不下佢咪上去搵人民幣，好過留喺度半紅不黑」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！