最平$27任添米線！長沙灣新開麻辣豬骨濃湯米線專門店

米線永遠都係香港人嘅comfort food！長沙灣新開一間米線專門店，餐廳環境闊落，牆身佈滿霓虹燈，門面以清新嘅 Tiffany blue色打造。食物方面以豬骨濃湯米線為主打，湯底使用大量豬骨熬成，濃郁鮮味，亦有唔少特色配料。新張期間仲推埋呢個抗疫優惠，只要客人堂食惠顧米線一碗，45分鐘內可以任添米線，最平$27就食到，啱晒平時食米線要加底嘅大胃王呀！

五寶過橋米線配豬骨濃湯

湯底豬骨濃湯用60斤豬骨及雞腳熬製最少4小時以上，浸過夜後第二日將豬骨及雞腳打成蓉，所以湯底呈現奶白色，味道濃而不膩，無味精飲晒成碗都無問題！五寶過橋米線配料有五款，滷水豬大腸自家滷成，好入味無腥味，另外仲有加拿大腩肉、蘿蔔、黃金花枝丸及滷水蛋。

八寶過橋米線配麻辣豬骨濃湯

麻辣豬骨濃湯個湯底都係豬骨濃湯，再加入用麻椒、四川花椒、印度魔鬼、子彈椒及紫天椒製成嘅辣油，帶有陣陣麻香，食得辣嘅朋友記得挑戰特辣或大辣，好過癮！想一次試多啲招牌配料，必叫八寶過橋米線，包括腩肉、肥牛、萵荀、自家製麻辣鴨血、芝士腸、日式玉子、魚腐及豆卜，後三款配料特別吸湯，一咬入口除咗食材原味，仲有香辣嘅湯底香～

招牌涼拌涼皮

涼皮口感似厚身啲嘅河粉，好滑身。加入有芫荽、炸黃豆、青瓜、麻醬及香醋麻油拌成，而辣味涼拌涼皮就加埋自家製麻辣醬，用辣椒、蒜頭、薑及香料爆香而成，香氣極濃！

涼拌紅油茄子、脆炸孜然雞翼、麻辣墨魚頭、泡椒蓮藕仔

餐廳仲有供應數款招牌小食，最受歡迎嘅麻辣墨魚頭每日賣成四五十份，口感爽脆；涼拌紅油茄子香辣惹味；脆炸孜然雞翼加入自家調製孜然粉、椒鹽等調味，香脆多汁，孜然味香濃；而泡椒蓮藕仔就爽脆入味。

玫瑰洛神花茶、巨峰提子乳酸梳打、白桃乳酸梳打

玫瑰洛神花茶用十幾種花調配而成，如玫瑰、洛神花及菊花等，而白桃乳酸梳打就加入日本新鮮白桃肉，食麻辣食物飲時就最啱！

米線樂•麻辣豬骨濃湯
地址: 長沙灣元州街231-247號潤發大廈地下B1舖