內地女子組合3unshine喺2015年出道，當年因外貌及非主流音樂受盡狠批，被封「最醜女團」。首支歌曲《甜蜜具現式》推出後，佢哋被批評MV拍攝差、造型照老土又騎呢、五音不全，質疑佢哋係靠「父幹」出道；當中網民就最唔睇好成員Cindy。不過女大十八變，上年Cindy宣布退團單飛，改名范依娜，更減肥成功，搣甩當初嘅肉肉外形，非常勵志。

Cindy當年參與內地網路劇《人百分百靠外表》，據知原本Cindy喺劇中與高顏值嘅區天瑞（Leo）飾演情侶，結果引起網民熱議，仲話心疼男主角，不過後來有指區天瑞因檔期問題辭演，由內地演員黃雨權代替。Cindy喺上年宣布退團單飛，佢昔日擁有小眼睛、包包面、及肉肉外形，不時被網民批評外貌。不過佢近年積極減肥，佢喺接受媒體訪問中表示自己曾重達60kg，連父母都睇唔過眼要收走佢啲零食；經過努力減肥後，肥胖身型及包包面不再，最輕試過體重僅得42kg，成功脫胎換骨。

Cindy不時喺小紅書拍片分享其減肥方法及運動視頻，認為健身係減肥必做運動，將健身當做興趣就唔會好難捱；同時佢主張均衡飲食，唔會攝取過多卡路里。另外，Cindy仲不時上載fit爆靚相，狂曬纖腰，盡現瘦身成果，唔少網民紛紛留言大讚佢線條好好及非常勵志。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！