會唔會跌穿20點？《巨輪II》收視跌至20.8點

由蕭正楠丶田蕊妮及陳凱琳等主演嘅無綫劇集《巨輪II》自播出以嚟收視同口碑都麻麻，原本以為可以好似上一輯咁受歡迎，點知今輯俾網民狂插兼負評如潮，好似負評王陳凱琳演技浮誇，見到佢已經熄電視、蕭正楠未有資格上男一位置丶劉思希膠面佛地魔鼻、似旅遊節目等等。

頭五集都仲有客串嘅陳展鵬同鍾嘉欣頂住，收視未算太差，但係上兩個星期收視已跌到得返22.2點，唔通網民真係講得出做得到只係睇頭五集, 之後就熄電視？去到中秋節長假期《巨輪II》平均收視更加只有20.8點。有網民就話陳凱琳拖累咗成套劇、如果唔係有大奸角吳岱融同梁琤撐起套劇，收視可能已經跌穿20點等等。

《巨輪II》嚟緊劇情將會越來越緊湊，喺預告片高天鷲（吳岱融飾）捉住個女Nana（陳凱琳飾）隻手。高天鷲對住佢講：「只要你肯放低同忘記呢件事，咁我哋一家人就可以好似以前咁，開開心心咁一齊過…」呢句對白即刻引起網民討論兼推測故事可能有重口味嘅發展 ，因為有劇透原來佢哋並無血緣關係，Nana親生爸爸係黑道中人，爸爸媽媽都係俾高天鷲所殺，後來Nana仲會向高天鷲報復。監製王心慰就話呢個星期會交代Nana係養女身分。唔知到時收視會唔會有機會上升呢？

另一劇集《為食神探》喺星期日播出大結局，平均23.4點收視，最高就有24點，全劇平均收視22點。