【有牙有鬍鬚】極像真男人下巴散紙包 你敢唔敢用？
電子貨幣大行其道，仲有幾多人會用散紙包？
呢個居然令我好想收銀阿姐瘋狂找錢俾我～～～
日本DJ doooo除咗搞音樂創作之外，
仲會整啲貌似人體部位嘅日常用品。
之前佢就製作過手指形狀圖章，拎去銀行用應該幾得人驚！
呢期佢嘅最新力作，係呢個男人頭。
個頭只有下半部，用人中去到下巴，有埋一條條鬚根，齋睇都覺得癲。
點知，原來可以打開佢個口，當散紙包用！
擘大口之後，仔細到見到連牙都有埋，十足真人一樣。
像真度高到咁，倒啲錢出嚟就真係名符其實嘅「嘔啲錢出嚟」。
如果有埋條脷仲伸到出嚟，咁就真係100分嘞。
之但係到時就唔止係散紙包咁用咯……
真係投產的話，我買十個！送禮就夠，自用則免。
