有種老闆娘｜江芷妮卸下明星身分 甘願親力親為洗廁所變身美容王國老闆

闊別娛樂圈多年嘅江芷妮（Cherie）日前擔任香港開電視節目《有種老闆娘》嘉賓，與主持人可宜大談創業心得；原來44歲嘅江芷妮除咗係兩子之母，仲用咗12年時間成立兩間美容院，打造「美容王國」，可謂愛情事業兩得意。不過，江芷妮做老闆並唔係得個樣，而係親力親為，就連洗廁所都曾經試過自己洗。

江芷妮2001年加入TVB，曾演出《隔世追兇》、《同撈同煲》等劇集，為當時力捧小花之一，不過佢就表示自己危機感好重又唔係好習慣呢種工作模式，所以決定學做美容增值自己：「其實當初入行，唔係話好想做明星，做藝人有好忙嘅日子，但亦有好得閒嘅時候，可能連續一星期都冇嘢做，唔慣呢種生活。」；起初江芷妮都係一邊做演員一邊經營美容院，但就因為員工一句說話而激發到佢離開TVB，訓身投入美容事業：「有次有個同事想問我啲嘢，不過佢問完後，就話『我諗你都係唔識』跟住轉身走咗，令到我想喺呢行學多啲嘢，慢慢就全身投入，冇做藝人。」

提到經營過程，江芷妮覺得如果只係掛名，唔全心全意去做，好難會做得好，所以當時佢就落手落腳幫手設計裝修，又親自同客人溝通、遞毛巾、洗廁所等等。直至宜家，江芷妮都會增值自己，報讀工商管理碩士學位，希望將美容事業做到最好及更妥善管理員工；被問到會唔會復出再做娛樂圈，江芷妮就話可以考慮拍親子節目，講吓媽媽經、生B經及湊仔經。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！