【本地遊】中西區半天文藝遊 設計展/畫展開催

肺炎疫情緩和，大家可能一早已經恢復正常工作，一到周末又想到處搵地方去。不過始終目前社區仍有零星感染，唔太適合去人多擠擁地方。今個星期介大家去半日中西區文藝遊，參觀文化展、畫展等，培養一下文藝氣息又可以出走散心，同埋保證人流唔會好似逛商場咁可怕，最啱一家大細或者拍拖去啦。

本地薑設計師 大玩「搶包山」概念

作為香港人當然要支持本地設計師啦，PMQ今個星期開始將會有《包山》設計展，為一個大型藝術裝置，由香港室內設計協會嘅建築師、室內設計師、燈光師及空間設計師合作建成，以本地「包山」傳統儀式作藍本，用上9千個平安包配以燈光及煙霧機關，變成一個超立體包山藝術裝置。同場另有十多件本地設計師個人作品，包括一木工房、Stickyline、曾首彥、文智來等。今次展覽仲會巡迴去到米蘭設計周，想參觀嘅朋友記得把握機會喇！

Re-edit

地址：中環鴨巴甸街35號PMQ元創方地面廣場

日期：9月18日至10月4日

時間：11AM至8PM

兩位本地女畫師 詮釋內心世界

呢一個由OUR GALLERY主辦嘅畫展，於灣仔舉辦，名為「Intertwined」；請來兩位本地女畫師Jennifer Chow周凱蓉、Mitchell Seeyu思遇；前者為Y世代畫家，擅長用塑膠彩及油彩，其創作嘅「Sad Cherry」系列從第一身角度詮釋少女內心世界；後者則已退休，從事水墨畫創作，創作多為香港土地故事。兩個世代嘅本地女性，各有不同取態及角度，絕對令你有意想不到嘅思想衝擊！

Intertwined畫展

地點：灣仔軒尼詩道302-8號集成中心UG 10

日期：9月15日至11月21日

時間：11AM至6PM（星期六1PM至5PM）

認識認知障礙症 腦化香港設計展

腦退化症，又或稱認知障礙症係香港普遍嘅老人病，為咗令香港人對呢種疾病有更多認識，特別開辦呢個「腦化香港」設計物語，由啟民設計研究團隊及本地設計師、社福專家透過不同形式作品，包括空間設計、影片、工作坊等，將一件件物件模擬患上腦退化，例如「腦化掃把」、「腦化外套」等，令人重新認識腦退化症。同場加映，由腦退化人士自己塗寫嘅多幅畫作，認識腦退化人士嘅內心世界。此展覽去年曾經於荷蘭設計周展出並大受歡迎，今次返到香港展出大家唔好錯過喇！

腦化香港設計物語

地點：西營盤忠正街2號地下及一樓

日期：9月15日至24日

時間：1PM至7PM