【本地遊】假日輕鬆遊 尖沙咀文青半天遊

本地疫情開始放緩，似乎第3波疫情暫時平息，限聚令等措施都放寬，鬱悶多時嘅香港人又係時候慢慢出返街，去到假日大家都好難再留喺屋企；喺呢個時間本地遊又有咩選擇呢？今日為大家尖沙咀幾個活動，大可花半日時間散下心，一解早前嘅煩悶，不過記得保持個人衛生，謹慎防疫呀！

楊學德作品展 重溫昔日尖東

舊日尖東對於大家嚟講除咗「五支旗桿」仲有咩呢？本地著名插畫師楊學德就於尖東海港城美術館舉辦作品展，展覽命題為「好像在那裡見過你」，展示楊學德超過40幅布本作品及十數幅水彩作品，以昔日九龍作為主題，包括90年代重慶森林、陳百強紅館演唱會、利時、百利商場等，令人穿越回憶與現在。而且今次係楊學德2016之後再度於海港城美術館主辦作品展，各位Fans唔好錯過，否則唔知又要等幾多年喇！

楊學德作品展「好像在那裡見過你」

地址：尖沙咀海港城海洋中心2階207號

日期：即日起至9月27日

時間：11AM至8PM

日本小清新Tearoom 食水果三文治

睇完展覽肚仔有小小餓但又未到晚飯時間，當然最好就係食輕食，去年由日本來到香港嘅Afternoon Tea Tearoom，踏入9月就正式登陸一周年，於是推出9月限定「1st Anniversary Fruit Tea Set」（每客$148），用上日本忌廉加上新鮮水果作為水果三文治，再配上一杯水果Earl Grey，另外仲可以自己挑選一款甜點作為結尾，超級滿足！趁限聚令啱啱放寬至4人一枱，可以叫埋幾位姊妹，又或同屋企人一齊去都得，大滿足！

Afternoon Tea Tearoom

地址：尖沙咀梳士巴利道18號K11 Musea B1樓B112B號

營業時間：12NN至8PM（假日11AM至8PM）

一解旅行癮 微縮看世界

疫情持續至今已經9個幾月，相信大部分人都被「禁足」無得飛，對於香港人而言咁耐無得去旅行真係嚴重吊癮；呢個位於尖沙咀誠品嘅水彩作品展，由著名插畫師兼西洋書洋高手Mandy Chan主辦，Mandy把世界各地名勝及風光收進3公分嘅水彩畫之中，因為每幅畫都係以相機底片嘅大小去量度尺寸，非常有特色。Mandy曾經舉辦類似「微型畫水彩展」，並且巡迴台灣、韓國及上海等地，反應非常熱烈，大家萬勿錯過呢！

「3CM的微縮世界」

地址：尖沙咀梳士巴利道3號星光行誠品書店3樓

日期：即日起至10月11日

營業時間：11AM至9PM