朱庭萱港台宣傳照被指修圖修過火 盧覓雪未打先認輸:鬥P圖我輸

·3 分鐘文章
「玻璃朱」朱庭萱和資深傳媒人盧覓雪獲港台邀請出席《視點31》討論
「玻璃朱」朱庭萱和資深傳媒人盧覓雪獲港台邀請出席《視點31》討論

香港電台《視點31》官方Facebook專頁曾預告今日(25/5)下午將以「娛樂為甚麼?」作主題,邀請資深傳媒人盧覓雪與KOL朱庭萱(玻璃朱)進行直播,討論TVB和ViuTV近來鬥綜藝、鬥娛樂嘅舉動。不過,玻璃朱及後喺Facebook發佈帖文,指收到港台消息將會取消直播,改為晚上8時轉播7分鐘:「唔做live會唔會又俾人剪頭剪尾。大家睇唔到最公平嘅一面...」佢又指其實自己都唔係咁想去,但因為主持多番邀請,又講明可以理性討論所以先應承:「最重要係今次Topic希望可以幫這兩年受TVB網上欺凌嘅藝員同客戶討回公道。大家到時留言支持下!」《視點31》Facebook專頁亦將原先帖文刪去再重新上載,確認下午直播取消改為晚上轉播,不過未有解釋取消直播嘅原因。

玻璃朱以「撐警言論」同埋批評MIRROR而出位,曾經直言MIRROR外貌唔出眾:「呢啲樣行落旺角大把啦,大驚小怪」,又一度發文指唔想傳媒將佢同MIRROR放埋一齊抽水,亦都唔想幫佢哋宣傳,咁大膽嘅言論當然得罪晒一班鏡粉,亦有唔少網民批評佢自大,所以好多人都好期待今次佢同盧覓雪嘅唇槍舌戰。

不過,亦有網民將重點放喺《視點31》嘅宣傳照上,指玻璃朱好似修圖修過火,仲話佢成個蛇精男咁款,可以改名叫 P圖朱,紛紛笑言:「改標題吧!P圖為甚麼?」、「可唔可以告違反商品說明?」、「工作人員會唔會認唔到位『藝人』㗎?」、「如果左邊(玻璃朱)係冇P圖,咁佢一定係外星人!」等等。

一班網民亦大撐盧覓雪,叫佢加油一定要KO對方;盧覓雪接受媒體訪問嗰陣就話主要係互相交流,理性討論,對於網民話玻璃朱P圖,佢就話因為自己唔識P圖,所以喺呢方面未打先認輸。同盧覓雪老友鬼鬼嘅杜汶澤就喺Facebook力撐對方,仲幫佢整咗張P圖後照片:「雪雪,既然人哋都P到飛起,你無奶油唔一齊P㗎?玩雙P吖嘛!你有冇禮貌架?唉,我嚟嘞!」相當搞笑!

盧覓雪
盧覓雪
「玻璃朱」朱庭萱
「玻璃朱」朱庭萱

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!