朱晨麗否認失寵 獲派打頭陣應戰

朱晨麗昨日偕劉佩玥及鄧佩儀排舞，為新綜藝節目打頭陣，對撼ViuTV的《口罩小姐》！她又否認失寵被打入冷宮，強調工作冇停過！

藝人朱晨麗（朱朱）、劉佩玥（Moon）及鄧佩儀昨日在電視城為周日啟播的《開心大綜藝》排舞，期間副總經理曾志偉探班。鄧佩儀笑言本身沒有舞蹈底子：「所以要死練，日練夜練，排咗3日左右，再各自喺屋企練。」又笑言凌晨在家排舞太嘈，被樓上敲地板投訴。本身有舞蹈底子的朱朱就表示今次表演是她們3人的主意：「搵導師、梳頭、化妝，再諗Idea畀佢哋，希望個表演會完整，頭先有少少甩漏，所以都要多啲時間排練，我哋每日2點至11點都喺度練。」

曾志偉探班打氣

講到節目由她們打響頭炮，對撼ViuTV的《最後一屆口罩小姐總決賽》，朱朱笑說：「係咩？我哋有唔同嘅睇點。（有信心？）我哋睇點係唔同嘅表演。」Moon亦說：「我哋全部係直播，希望畀大家睇到我哋嘅心意，唔需要比較，我哋同人哋都係落足心機做。」講到志偉來監場，可有壓力？她說：「又冇緊張，邊個睇都好，想畀好嘅表演大家睇，頭先監製同曾生都喺度，唔覺得係壓力，反而係打氣。」

另外，提到朱朱已一段時間沒有劇集出街，她說：「等公司安排，作為演員被動，都要各方面配合。」有傳前無綫主席陳國強離巢後，她被打入冷宮，朱朱否認：「根本冇呢件事，演員係好被動，要睇吓有冇啱嘅角色同檔期啱先會畀你去做。」她強調工作沒停過，演出的電影及劇集尚未推出。對於有傳約滿後不再續約，她只說：「傳啫，信唔信呢，你哋自己放長雙眼睇。」