李丞責(上) 做父母唔係擇日改名等運到

堪輿名家李丞責13年與港姐冠軍劉倩婷結婚，如今女兒阡辰兩歲半大，夫妻兩人正計劃著給阡辰添個弟弟妹妹之餘，當然更清楚，不論生幾個，最重要的，還是要教！身為堪輿學家，李丞責也承認，遇上的客仔不少都是準父母或是為人父母：「擇日啦、改名啦，除咗呢啲仲遇上好多家長問我一個問題，就係面試名校著咩色衫增加成功錄取機會……呢啲其實有啲錯重點，做人父母唔係擇咗日出世就可以印印腳坐喺度等佢做皇帝架！」

兩歲女改名背後有意思
16年三月，李丞責和劉倩婷的女兒出世，雖然近水樓台爸爸就是堪與名家，不過改名字當然不是只有計筆劃夾命相，女兒的名字背後也蘊藏著父母對女兒的期待和寄望：「阡字即係阡脈，有南北貫通嘅河田、耕地嘅意思，代表一個陸地；辰字呢，就係時辰，亦代表生肖龍，仲有一層意思係快樂。兩個字加埋即係快樂嘅地方，呢個名背後嘅寓意，都係希望個女長大以後無論喺任何地方、人生處於高峰或者低谷，都可以有能耐找到自己嘅快樂。所謂一命二運三風水，並唔係有啲人理解到做人只係靠命咁被動，其實『人』包含遺傳、文化、人際關係，『地』講緊環境同風氣，『天』意指世間萬物好似齒輪一樣絲絲入扣嘅互相關係，即使係我屋企人、老婆同個女，我都永遠唔會叫佢哋等運到，成功係要靠個人努力！」

改變命運從呢十點做起
19歲已經成為堪與師，儘管知多識廣經驗豐富，師父說，常為父母指點迷津改名擇日的他，對於教養下一代，也是到了自己做了爸爸後體會才更深切、理論也更具層次：「做人同教養小朋友並唔係一命二運三風水咁簡單，我覺得人生命理可以分為十個原素去改善完整，當中包括一命、二運、三風水、四積陰德、五讀書、六名字、七相、八教神、九交貴人同埋十養生。舉例嚟講，運並唔係等運到，而係講緊機會，遇到好機會時如何把握、還到時機壞時又點樣處理得好；積陰德，唔係講緊前世，而係話小朋友係一張白紙，修養修為大多來自父母灌輸俾佢嘅觀念以身示範，正所謂送子千金，不如授子一技；而教神，就講緊信仰，無論信咩宗教都好，都係講緊導人向善、加倍信心同堅定信念；交貴人嘅道理都好簡單，正所謂近朱者赤、孟母三遷都係因為呢個原因……總括而言，時辰八字並唔可以決定一生，而係父母點教點養！」

預告：爸爸是堪與學家，媽媽則是港姐冠軍，名校畢業、大學在倫敦大學經濟系畢業，可想而知，李家千金在家接受的教育中西貫通，小小年紀兩文三語隨時轉channel，全靠父母分工合作！