李佳芯嫌爆炸頭趕姻緣最驚攝灶罅

東方日報
·2 分鐘文章
李佳芯掟飛鏢,好眼界!
李佳芯掟飛鏢,好眼界!

李佳芯在劇集《殺手》的爆炸頭造型大受網民歡迎,但她笑言擔心會因為這個造型而嫁唔出!而打上癮的黎耀祥提議「添食」,希望與龔嘉欣演雌雄大盜!

藝人黎耀祥、龔嘉欣及李佳芯等,昨日在將軍澳電視城宣傳劇集《殺手》,該劇首集錄得七天跨平台總收視最高29.6點,有193萬觀眾捧場。李佳芯的「爆炸頭」造型大受網民歡迎,她卻笑說:「觀眾好似鍾意同我唱反調咁,我愈話唔好,啲人就愈鍾意,我驚留呢個爆炸頭會嫁唔出!(男友唔鍾意?)唔係,冇問佢鍾唔鍾意,不過連陳豪都讚好,叫我保留呢個髮型。」她本來計劃在書展推出新書,惟書展受疫情影響要延期,她說:「諗緊變陣,本書下星期書局有得賣,簽名會就要等疫情好轉。(喺每本書送香吻?)我覺得好變態,我冇咁嘅自信,唔覺得啲人想收到!」

預告下月開新劇

有傳李佳芯因政治立場遭無綫「雪藏」,已年多沒拍劇,而《兒科醫生》(前名︰兒童醫院)角色更由張寶兒頂替,她指從未聽聞會拍攝《兒》劇:「自己聽過8月中會開新劇,已經見過監製,不過等佢哋公布。」她又否認購買西貢千萬獨立屋求轉運,但希望在兩年內置業。

至於黎耀祥與龔嘉欣劇中動作場面多多,近日播出救江美儀的戲份更拍了兩日,龔嘉欣說:「好多動作場面只係一、兩分鐘,但拍就兩日。」黎耀祥笑說:「拍得辛苦,但係自己有滿足感,我都打算進軍武行,我哋拍多套續集,打得再甘啲嘅,做雌雄大盜!唔知係咪啲幕後睇咗呢一套,下套《拳王》我又係做拳手,如果唔係疫情,我依家已經訓練緊泰拳。(要操得更弗?)要操啦!唔悶嘅,但係有啲後悔。」龔嘉欣笑指拍攝《殺手》時已摸勻黎耀祥的腹肌,大家還圍着他拍照,黎耀祥笑言好像變成動物園的動物任人參觀。

龔嘉欣起飛腳退敵,好勇猛!
龔嘉欣起飛腳退敵,好勇猛!
黎耀祥出拳打木板,嚇到江美儀皺晒眉。
黎耀祥出拳打木板,嚇到江美儀皺晒眉。