李佳芯新劇《智能愛人》疑為奧運攝期未受重視 馬德鐘父子檔新劇都係8月初登場

TVB近日喺節目安排上作出大改變，將一向播放劇集嘅黃金時段讓路畀綜藝節目，亦為配合7月23日至8月8日轉播《2020東京奧運會》，所以原定喺8月2日晚上9時30分播出嘅劇集《智能愛人》將順延至10時15分播出，直至8月9日先回復晚上9時30分播出，而8月9日晚上8時30分將會播放由鮑起靜、馬德鐘、唐詩詠主演嘅《我家無難事》。

《智能愛人》以人工智能為題材，由李佳芯、馮盈盈以及陸永主演，除咗演員搭配有新鮮感，由於李佳芯喺劇中飾演人工智能機械人「阿寶」嘅關係，需要長時間配戴有色隱形眼鏡，模仿機械人嘅肢體動作，亦需要以美少女戰士、女僕等造型亮相，比過往嘅角色更具挑戰性，甚有睇頭。李佳芯疑喺2019年因發表敏感言論遭雪藏，亦遭多套劇集易角，直至2020年暑假無綫將《殺手》作重頭劇播出，李佳芯先叫做解凍，雖然未有承認雪藏消息，但佢就曾接訪媒體訪問坦言，自己無問過公司，亦唔需要問，只需做好手頭上工作。

《殺手》播出後反應亦理想，有指無綫有意放生李佳芯，故喺今年3月時繼續安排李佳芯有份拍攝嘅《愛美麗狂想曲》播映，網民當時表示期待，表示：「有Ali一定要睇！」、「Ali套劇終於出」、「就是期待Ali」等等。不過今次《智能愛人》被安排嘅播出時間，明顯係為奧運攝位，似乎未有太過重視。

至於，喜劇《我家無難事》除咗鮑起靜有別過往嚴肅形象，飾演風趣幽默嘅媽媽成為賣點，馬德鐘囝囝馬在驤亦有份參與客串飾演馬德鐘年輕版，父子檔上陣亦令人期待。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！