李佳芯牛年轉運圓夢 張曦雯做埋視后先嫁

東方日報
·4 分鐘文章
李佳芯與張曦雯都想買樓!
李佳芯與張曦雯都想買樓!

視后李佳芯踏入牛年即轉運,新劇排住隊出街隨時事業再攀高峰,她揚言計劃今年一圓上車夢,添置安樂窩與家人居住,意味繼續與男友陳炳銓「分居」。而同樣正值上位期的花旦張曦雯,講明無意當人妻,全力儲錢置業,兩女「寧要磚頭唔要膊頭」!

李佳芯去年是非纏身,除了慘被連飛4劇外,又傳與男友陳炳銓分手,事業愛情都麻麻。不過新年新氣象,踏入牛年即轉運,由她主演的兩套新劇《智能愛(AI)人》及前年拍下的《愛美麗狂想曲》於今年播出,意味着視后將捲土重來。自我要求極高的她,對於去年事業成績的滿意程度只打60分,僅僅合格之上。她形容去年是實在的一年:「上年最令我印象深刻嘅係第一次出書,由籌備、落筆、出書,大半年間完成咗一件一直想做嘅事,好似懷胎9個月。」

談及新年願望,她透露有望今年實現置業夢:「我Feel到差唔多啦,因為樓價開始回落。(同家人住?)同屋企人住係我一個目標,好老實空間都要足夠,但香港要咁大嘅地方都要一定嘅價錢,或者考慮買兩間屋住得近。」言談間似乎未有計劃再與男友共築愛巢。儘管去年負面新聞從四面八方襲來,但她選擇欣然接受,又指曾被家人問過為何在電視上甚少見到她,自稱「報喜鳥」的她習慣報喜不報憂:「我同佢哋講唔好畀報道影響,事實上冇可能24小時都喺電視見到我,我只可以講呢啲令佢哋唔好太多擔心同幻想。」

𢭃利是被取笑即反擊

適逢農曆新年,拜年時少不免上演一場「問答大賽」,她也逃不過親戚們的「關心問候」,她笑說:「早幾年親戚會問我幾時結婚,但我發覺呢幾年真係冇再問,可能放棄咗我,哈哈!我哋呢行講際遇,好多事冇得預計,今日唔知聽日事。有啲細過我嘅表妹一派利是畀我,其他長輩就笑我『你仲好意思攞,你自己應該要派啦!』但我好厚面皮駁嘴『有得攞點解唔攞?』」

事業愛情兩得意的無綫花旦張曦雯(Kelly),雖然已認定了外籍男友,再加上風水師贈言牛年宜結婚,但伊人寧願投資磚頭也無意當人妻,還搞笑把視后獎座與結婚一事掛鈎,笑指當目標達到便是出嫁之時。

回顧過去一年,Kelly表示有幸於劇集做女一,還首次成為視后候選人,就連「最受歡迎電視女角色」也打入5強,足以令她滿足。問到下個目標是否視后?她笑說:「攞到都開心,但講天時地利人和,有信心終有一年會成功,依家拍緊《白色強人II》,演腦神經醫生好專業,但心底又好細路女,鍾意談戀愛,同郭晉安延續上集感情線,陳豪就係前男友,佢返嚟想搶番我。」

「結婚唔代表開心」

談到牛年展望,她寄望可以拍電影。問到會否想升呢做人妻?她耍手兼擰頭說:「唔想嫁住,雖然早前拍風水節目,師傅話我今年適合結婚、生仔同買樓,我認為買樓就夠了,千祈唔好結,心態完全未準備好。(幾時先結?)呢一下開心就OK,結婚唔代表開心,Keep住個狀態,冇計劃,要睇事業,拎咗視后就可以結啦!」

身為孝順女的她,為讓身在美國的父母早日退休來港團聚,正努力儲錢置業。問到首期準備如何?她笑說:「距離目標差好遠,因為2020年似暫停咗一年咁,所以今年要努力。(置業先?)係呀!仲諗緊唔知應唔應該,睇吓得唔得,有自己屋企個人定啲,有個儲錢目標。」

李佳芯似乎未有計劃再與陳炳銓築愛巢!
李佳芯似乎未有計劃再與陳炳銓築愛巢!
張曦雯與男友愛得甜蜜。
張曦雯與男友愛得甜蜜。