李雨陽賺錢養家 努力捱出頭還清40萬卡數

如果要數無綫嘅經典校園青春劇，相信唔少人都會記得2003年嘅《當四葉草碰上劍尖時》，當年劇集搵咗唐詩詠、2R嘅黄婉佩（前藝名黄婉伶）、黎諾懿及李逸朗及李雨陽等新人做男女主角。身高6呎3吋嘅李雨陽飾演高大又英俊嘅有富二代Don少，當年真係迷死唔少少女。

現年40歲嘅李雨陽，星途認真麻麻，加入無綫後工作量一直唔多。曾經因為生活拮据，要喺尖沙咀時裝店做兼職售貨員賺外快，更曾經試過欠下40萬卡數，當時佢就話試過1年1騷搵千幾蚊，即係每個月得百幾蚊。佢自己唔係富二代藝人，而啲錢又唔會自己跌落嚟，所以就兼職做售貨員。開工期間仲試過撞到藝人，當時有啲尷尬，不過因為要食飯，所以唯有自己調節心情。

好彩佢有堅毅不屈嘅精神，覺得「東家唔打，打西家」，唔怕辛苦亦唔怕捱，結果好快就順利還清40萬卡數，仲離開咗無綫，轉投香港電視網絡（港視）簽約做合約藝人，之後仲轉戰內地市場。為咗生活，李雨陽惟有放下身段，曾經於觀塘同世叔伯合資售賣原味雞，佢好多野都親力親為，早上7至8點就開檔，唔單止搬搬抬抬去送貨，仲要喺街市大叫大嚷，吸引師奶街坊幫襯。其實雨陽咁博都係為咗頭家，為咗佢嘅寶貝仔。佢仲話過只要返屋企見到個囝囝「小芝麻」就覺得咩都值得，親情真係難能可貴。

疼錫個仔不特止，雨陽原來仲係一個出名愛妻號！早兩個月前佢太太同幾個朋友夾份，喺觀塘廣場開咗小食店賣點心、蒸飯及串燒等等嘅小食。 佢唔想太太濕手濕腳，同洗碗碟咁辛苦，所以佢就包辦收鋪前嘅清潔工作，好多辛苦野都自己做唔想老婆捱。