李鴻生師傅

星島日報

【星島日報報道】去年底,益新飯店靈魂人物麥景洪告老退隱,大批老饕親到益新向佢致敬,之後,若有所失,心情沉重,因為,香港能夠做出經典懷舊廣東菜的老師傅,又少一個,真無奈。

幸而,仍未至到全面消失,在「瀕臨絕種」的稀有大廚中,有三兩位尚健在,頂住。其中之一,正是李鴻生師傅。李師傅入廚數十年,一直在「紫荊閣」出任總廚,之前位於窩打老道,後因租約問題,停了幾年。兩年前在紅磡蕪湖街捲土重來,不少熟客再續前緣。

不過,初初重開,有很多Teething Problem,例如廚房班底及樓面班底要重新磨合,這個,不能硬來,必須有耐心讓其慢慢走順。到底,老鋪行的是平民大眾化路 ,而今天,走的則是中產美食路 ,有一定分野,故由大廚到經理到食客,必須重新適應,才可發揮化學作用,急不來。

終於,兩年過去,上周,我有一圍十四位為食鬼要搵地方開餐,又諗起紫荊閣,於是,WhatsApp其掌舵人藍小姐,聲明:「七千元,全包,十四位食飽,要經典廣東菜,愈懷舊愈好!」

一日後傳來菜單——蜜汁雞肝拼鍋貼帶子夾、龍川鳳翼、生磨杏汁燉豬肺湯、白花釀魚肚、原條麒麟玉樹斑、荔蓉香酥鴨、雞油扒豆苗、清宮御廚雞、上湯蒸粉果、蓮蓉西米焗布甸、蓮子紅豆沙。茶芥加一,酸菜全免,七千元!

結果,大家食到鼓掌。完後,為表欣賞及敬意,速速拉住李師傅及藍小姐拍照留念。呢種回應,相信作為大廚及經營者,有無盡滿足。

究竟,大家自己拉隊即興殺去,能否食到同一菜單、同一水準呢?答案係——唔得!因為,美味菜式皆「功夫竇」,要準備幾日,心機菜也。你能否有同樣口福?唔試唔知,Call藍小姐啦!

地址:紅磡蕪湖街83號「逸.酒店」一樓

電話:3184 0166

阿碌開咪 曾智華

副刊

你可能還想看