東京奧運︱王嘉爾Jackson以「兄弟」相稱賀張家朗奪金 網民質疑有抽水之嫌？

港隊劍擊代表張家朗喺周一（26日）舉辦嘅東京奧運男子花劍項目中贏得金牌，亦係繼1996年「風之后」李麗珊喺亞特蘭大奧運贏得滑浪風帆金牌後，再度有運動員為香港奪金，唔少市民都喺社交平台祝賀張家朗；藝人方面，麥明詩、姜濤、何超蓮，甚至近年主力喺內地發展嘅G.E.M.鄧紫棋以及王嘉爾（Jackson）都有出PO或喺IG Story恭喜對方，不過有網民就認為Jackson嘅帖文有抽水之成份？

王嘉爾早前喺國家隊女子劍擊運動員孫一文重劍項目奪金後，隨即發文祝賀對方，令網民憶起佢曾經都有一段劍擊史，爸爸王銳基係前港隊總教練，媽媽周平就係國家隊體操運動員，而佢自己就喺10歲開始接觸劍擊，12歲參加全運會得到金牌，亦係前香港劍擊代表隊成員，之後因爲要到韓國JYP公司做練習生先放棄劍擊，同時犧牲埋2012年征戰倫敦奧運嘅機會。

喺張家朗奪金後，王嘉爾喺微博發文祝賀，仲以「兄弟」稱呼對方：「為你而驕傲，兄弟！真的值得紀念的一天！看了總決賽，恭喜你！現在在回家，回去以後再看幾遍！」一班香港網民對Jackson選擇喺微博用上簡體字發文感不解，先係認為張家朗唔係成日玩微博唔會見到帖文之餘，更對王嘉爾（Jackson）所用嘅「兄弟」字眼感到懷疑，指二人參與劍擊隊時間唔同，加上張家朗係玩花劍項目，而王嘉爾就係玩佩劍，所以無可能熟到稱兄道弟，甚至未必會認識對方，紛紛留言話：「嘉嘉，家朗冇微博，不如你響Facebook同埋ig裏tg佢喇～」、「又抽人地水 朗哥家陣家傳戶曉，好心你就唔好抽人水啦」、「好心佢啦，係到認親認戚，人地識佢老鼠咩，不知所謂」及「勁失望，ig一個post都冇」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！