東張西望｜吳幸美上前質問當眾自瀆怪叔叔 網民：呢啲咪就係專業囉

無綫資訊節目《東張西望》一向關心社會時事、娛樂八卦及民生等議題，早前嘅聾啞人士美華單位被保安員佔據及大埔富亨邨曱甴屋引起公眾高度關注，喺噚晚（18日）最新一集節目組派出吳幸美去到將軍澳厚德邨直擊一位中年漢於公園光天化日下做出猥褻行為，期間吳幸美更與呢位怪叔叔直接對話。

有觀眾向《東張西望》提供消息指有一位行為怪異嘅中年漢經常喺將軍澳厚德邨出現，佢近乎隔日早上7至8點就會喺邨內一間幼稚園附近嘅長凳當眾自瀆，呢段時間正值幼稚園學生返學，令街坊非常害怕和不安，大人同小朋友都會避之則吉，甚至有家長向學校反映，而學校亦曾經向管理處投訴但不果。喺拍攝當日早上7點，吳幸美連同採訪隊已經喺附近等候，去到大約8點怪叔叔終於出現，佢好似平時咁坐喺同一張長凳，雙腳撐牆及左望右望後做出猥褻行為自娛，過程更被攝影師拍攝到。喺怪叔叔離開之前，吳幸美立即上前質問「頭先我喺度見到你做一啲不雅動作」、「點解會咁做嘅」及「會唔會知自己犯法」等問題，不過精神恍惚嘅怪叔叔只係用「係呀」及「會呀」等簡單回答。除咗當眾自瀆之外，怪叔叔更會當眾便溺，而佢就以「急呀嘛」去解釋呢個不當嘅行為。

吳幸美與怪叔叔交談後，原來曾做清潔工人嘅佢無兒無女，並喺附近屋邨獨居。而吳幸美亦發現佢精神有問題，係一名有認知障礙嘅隱蔽長者。怪叔叔亦透露自己以前有去精神科求診，不過而家就冇。最後吳幸美要求怪叔叔要定期覆診服藥、及終止做出猥褻行為，而吳幸美並話會報警處理。不過喺採訪當日幼稚園就報警求助，而警方就以涉嫌破壞公眾體統拘捕一名58歲男子。

節目出街後，唔少網民大讚吳幸美，例如「幸美硬食,呢D咪叫專業囉」、「佩服夠膽上前做訪問」、「呢啲咪就係專業囉」、「幸美好勇」、「吳小姐 妳好夠薑！」。另外，亦有網民認為節目做認為搵男主持去採訪怪叔叔會比較合適，留言話「其實真係好尷尬，幸美好慘，仲要訪問個怪叔叔 不過佢真係好專業，仲要即刻衝出嚟訪問佢 點解唔叫Patrick訪問佢呢？」及「好心搵個男主持去做呢個行動啦！人地始終係女性。不過幸美好專業，值得一讚！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！