林作不敵19歲「新丁」 裕美：唔死已經贏！

林作將於9月與「富三代」鍾培生舉行「百萬擂台戰」，自信爆棚的他，昨日率先挑戰人生首場拳賽當熱身，但被年僅19歲的對手打敗，未能「大蝦細」，在場邊打氣的女友裕美緊張到跪地，揚言：「佢唔死已經贏！」

林作昨日參加《Energy Fight 2021第一回》賽事，雖然因超磅而被罰1張紅牌及扣2分，但有女友支持的他仍信心十足。他指媽咪沒有撐場，亦不關心他的打拳進度，應該不知道他出賽。

林作在第10場（Shoot 10）男子業餘組67公斤（西洋拳）賽事中，與19歲對手黃明雋對戰，黃明雋有一次比賽經驗，在年齡及經驗方面稍勝。賽事共3個回合，每回合2分鐘，首回合林作不停游走，進攻不多，未幾被打甩頭盔；來到第二及第三回合，他開始出拳進攻，期間不慎跣腳，又多次攤開雙手挑釁對方，最終打成平手，要進行Extra Round。最後一局，林作愈見進取，更成功擊中對手，惟最終以0比3落敗，評述員讚其處男賽表現不俗，打法聰明。

裕美賽前向男友又攬又錫，笑說：「佢唔死已經贏！」她指男友近月每日早出晚歸練拳，見證他愈來愈大隻，胸部由鬆弛練到有胸肌。雖然口硬稱不擔心男友被打，但她觀戰期間肉緊到跪地，不停打氣叫「作作」、「打死佢」！

鍾培生先讚後彈

而鍾培生亦有前來踩場，不屑地表示來看「女朋友」，對林作的表現先讚後彈：「我想佢贏，佢打得唔太差，有勇氣，上得擂台都值得尊重。不過佢唔係我對手，希望佢喺錯誤中學習，9月時唔好畀我打死。」又表示自己都會做挑釁動作，但大前提要贏，寸爆林作打輸。林作回敬鍾培生的「女朋友」稱呼，嘲諷對方性傾向。提到輸給後生仔，他反駁表示不想恰「o靚仔」：「唔想恰細，今日只出咗一成實力，我跳出跳入，就知唔係要同佢死過。」