林夏薇入黑玩喬裝

視帝陳展鵬與林夏薇昨日出席新劇宣傳活動，展鵬相隔3年再出劇，笑言是「出山」，但自爆有少許髮線後移，可以退休！而薇薇透露劇中有多個喬裝造型，自爆學生時期為保安全，曾扮男生回家。

陳展鵬、林夏薇、馮盈盈、黃智賢及劉佩玥等，昨日在電視城宣傳新劇《逆天奇案》。展鵬相隔3年再「回歸」，他笑說：「係呀，出山！上一套已經係《天命》，今次練得一身好武功。（有信心收視好？）希望啦！大家畀咗好多心機。」薇薇劇中與展鵬是一對，今次飾演小女人，當中更會喬裝不同造型，包括空姐及「羅拉」等，展鵬即笑說：「好有說服力，唔知屋企有冇咁着呢？」薇薇即自爆有喬裝經驗：「以前一個女仔喺北京讀書，夜晚返屋企危險，會買個假髮同戴黑框眼鏡扮男仔，即刻好安全，冇人理你。」

呻髮線後移要退休

問展鵬可會喬裝？他笑說：「好少，入戲院會戴眼鏡，因為有散光。之前會戴帽，但依家唔敢戴，驚甩頭髮。」並自嘲髮線有少許向後移：「有就可以退休，哈哈！不過依家科技先進，可以植髮，我以前拍古裝要剃頭，曬傷頭皮搞到敏感，有啲稀疏，都擔心唔會生番頭髮，後尾發現原來只係發炎。以前20幾、30歲就可以剃頭，依家要睇環境。」

同場的黎燕珊透露飾演薇薇的媽咪，展鵬是其女婿，並大爆2人與馮盈盈是三角關係，她笑說：「所以開工我成日鬧個女婿：『你咁樣仲係男人嚟咩？』工作人員就會同我講已經Cut咗機，佢哋驚我停唔到。我係過來人，大家以為我好憎男人，其實我好溫柔，只係演繹得太好。」她又透露最近與女兒拍廣告，成品將於母親節出街，女兒用了酬勞買禮物送給她。