林子超香港電視史上首個「Drag Queen」演出大獲好評 奮力造演員夢:想畀觀眾知原來我可以咁百變

林子超香港電視史上首個「Drag Queen」演出大獲好評  奮力造演員夢:想畀觀眾知原來我可以咁百變
林子超香港電視史上首個「Drag Queen」演出大獲好評 奮力造演員夢:想畀觀眾知原來我可以咁百變

講起林子超(Andy)呢個名,好多人未必對佢有好多認識。不過佢喺TVB節目《全城一叮》以Drag Queen 打扮演出,相信好多人都睇過!早前喺《全城一叮》以Drag Queen 打扮跳舞嘅佢當時觀眾好評,帶嚟唔少迴響,之後更加有機會喺TVB台慶亮相再次演出。

林子超喺《全城一叮》以Drag Queen 打扮跳舞嘅佢當時觀眾好評。
林子超喺《全城一叮》以Drag Queen 打扮跳舞嘅佢當時觀眾好評。

首次挑戰 Drag Queen 挑戰自己嘅可能性

對於Andy喺《全城一叮》嘅演出,相信好多人都會好疑惑點解佢會揀一個咁前衛嘅演出,特別係喺TVB,甚至係香港呢個觀眾仍然相對保守嘅地方。Andy就直言其實佢本身預計觀眾嘅評價會係好壞參半。不過本住作為一個演員,一個表演藝術者嘅諗法,佢更加想話俾人知「林子超係可以咁百變」,要挑戰自己嘅可能性,挑戰喺香港電視史上未有人試過嘅演出。

當然,要挑戰新事物就一定要面對唔同嘅困難,更何況係Andy嘅Drag Queen演出要面對嘅唔單單係一個新嘗試,而係好多樣唔同嘅新嘗試,例如係服裝、指甲、化妝,就連跳舞方面同Andy以往跳開嘅舞都有唔同!為咗令表演每一個環節都盡善盡美,Andy喺每一步都落足心機,由化妝去到服飾佢都有份參與。佢更加為咗可以著高踭鞋行起上嚟更加有美感,特別去上堂學點樣著高踭鞋,落足心機注重每一個細節!

化妝、服裝都親力親為參與。
化妝、服裝都親力親為參與。

「透過每一個機會換下一個表演機會」

患有先天心臟病嘅Andy曾經仲做過開胸手術,不過佢依然繼續苦練跳舞。當被問到點解會有呢份堅持,佢嘅答案非常簡單:「因為鍾意,鍾意一樣嘢就唔會覺得係困難」。因為鍾意表演,佢可以克服病魔苦練跳舞;因為鍾意表演,佢可以突破自己,接受任何新嘅挑戰;因為鍾意表演,佢可以為咗一個表演用幾個鐘同朋友一齊製作舞衣,再不斷排練力求完美。佢知道唯一可以做嘅就係「透過每一個機會換下一個表演機會」。

Andy加入TVB嘅第一個角色係喺宮心計2深宮計飾演心狠手辣嘅太醫,當時都得到過迴響,不過演員嘅身份令佢只能被動等角色,所以好快又沉寂落嚟。或者就係咁,Andy更加知道作為表演藝術工作者同演員嘅唔容易,佢更加想「透過每一個機會換下一個表演機會」,所以更加知道想有人見到自己,就要諗辦法更加主動突出自己,所以先會有《全城一叮》嘅Drag Queen演出。

所幸嘅係,隨住近年觀眾口味嘅唔同以及演藝行業嘅革新,無論係TVB定ViuTV都開始嘗試做唔同嘅選秀同真人騷節目,例如ViuTV嘅《全民造星》、TVB嘅《聲夢傳奇》,甚至係《好聲好戲》、《香港小姐再競選》同埋《全城一叮》,俾機會同舞台一班仍然滿懷熱血嘅素人同藝人,等佢哋有更加多嘅機會將自己最好嘅一面展示畀觀眾,令表演藝術工作者呢個身分變得更加主動,只要你肯加倍努力去突出自己,觀眾就有更加大嘅機會見到。機會往往留畀肯努力而且肯創造嘅人!

林子超:透過每一個機會換下一個表演機會
林子超:透過每一個機會換下一個表演機會

「你叫我做咩都得,我冇底線㗎」

雖然Andy對於自己嘅表演細節一絲不苟,對妝造都有自己嘅意見。不過只要係為件事好,Andy都會肯去做「你叫我做咩都得,我冇底線㗎」,訪問當日攝影師提議佢試唔同嘅Pose,佢都會二話不說照做,好似係著住高踭鞋企上枱之類嘅高難度動作。如果唔係對表演有團火有熱誠,都好難會咁落力做!

林子超:你叫我做咩都得,我冇底線㗎。
林子超:你叫我做咩都得,我冇底線㗎。

繼續追尋演員夢 要畀觀眾見到「百變嘅林子超」

一個表演成功帶嚟迴響,Andy冇忘記自己嘅目標,現階段佢最想做嘅都係一名演員「現階段追尋緊演員夢想,今次只不過係用咗跳舞呢個媒界帶畀觀眾一啲訊息,想用演員嘅身份畀觀眾知道原來林子超呢個演員係可以咁百變」。

講到嚟緊最想挑戰嘅角色,Andy就話最想挑戰精神病患者,「如果可以經歷一個思想咁Complex(複雜)嘅角色,對人生可以有更大嘅體悟。同埋可以再一次將自己抽絲剝繭,睇吓腦內嘅細胞有邊啲嘢可以做到呢個角色,覺得會係個非常好嘅旅程」。正如Andy都提到,想做演員因為想Experience(體驗)唔同人嘅人生,呢啲經驗唔止可以令每個角色更有色彩,更加可以令演員對自己有更多嘅體會,造就佢哋成為一個更加唔同,有更多面向嘅人。

林子超:想用演員嘅身份畀觀眾知道原來林子超呢個演員係可以咁百變
林子超:想用演員嘅身份畀觀眾知道原來林子超呢個演員係可以咁百變

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!