【林建名逝世】契女多多 同何傲兒傳爺孫緋聞當眾流淚

富商林建名因淋巴癌逝世，終年83歲。林建名之父林百欣曾經係亞洲電視大股東，同父異母細佬林建岳亦擁有音樂及電影事業，林建名都同娛樂圈大有淵源。

人稱「大少」嘅林建名生前開設「大名娛樂」多年，主要係籌辦演唱會同管理藝人，近年亦有參與電影投資，出品包括《使徒行者2》及《犯罪現場》。不過大少登上娛樂版，更多時候係因為緋聞。

講起何傲兒緋聞公開流淚

林建名多年來同圈中女星傳過唔少緋聞，近年最為人討論嘅係同何傲兒（現改名何天兒）嘅爺孫「情誼」。2014年，何傲兒同比佢年長51歲嘅林建名一齊睇演唱會，狀甚親密。但係後來何傲兒含淚否認「爺孫戀」，林建名事後回應都話女方唔聽佢電話，大少仲喺見記者嘅時候流晒眼淚！後來何傲兒同TVB約滿，轉投大名娛樂，仲同林建名上契，之後二人關係不了了之。

著名契女戴夢夢

林建名另一個出名嘅契女係戴夢夢。被大少稱讚「靚過白雪公主」嘅夢夢，加盟大名7年之後契埋老闆做契爺，仲同同門新人劉愷欣一齊上契﹐好溫馨。

簽趙碩之尹蓁晞不歡而散

大名曾經簽過身材勁爆嘅趙碩之及尹蓁晞，但係後來都搞得唔太愉快。當林建名係「爸爸」嘅趙碩之投訴被大名單方面續約5年，否則解約就要賠40萬，林建名曾經對記者向趙表示不滿，後來終於得大少放生。至於尹蓁晞被指掛住拍拖唔接工作，令大少有所不滿。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！