林穎彤離巢無綫為HOYTV節目錄影 搞網店一腳踢獲粉絲支持

童星出身嘅林穎彤（Bella），唔經唔覺入行超過20年，近年向多方面發展，唱歌、拍劇及做主持工作不斷，但上年捲入JPEX案風波及被控「在醫院作出擾亂秩序的行為」罪，官司期間疑被TVB「雪藏」，暫停所有工作。月初佢上載短片到社交網站宣布離巢，結束與TVB 15年賓主關係，向新跑道勇往直前。前日（27日） 佢為HOY TV節目《開運秘笈2025》錄影，期間佢接受傳媒訪問，表示唔介意俾人聯想係棄將，最緊要係做到自己想做嘅嘢。

林穎彤前日為HOY TV錄影節目，佢表示感覺好新鮮，因為第一次外出工作。佢提到自己喺修讀「應用營養學及營養補助劑基礎證書」時，已經有同經理人提議工作上有所遷就，其實有兩年係少咗工作，而完約亦好自然地結束，佢覺得係一個里程碑，同時呢個決定亦都經過深思熟慮。不過佢喺完約前捲入官司，所以難免被人聯想佢係一名棄將，Bella就話佢啲朋友都有呢個諗法，而佢就知道自己想轉換跑道，最緊要係做到自己想做嘅嘢。

林穎彤除咗讀營養課程，亦有報讀護膚及精油香薰課程，最後仲認識咗一位藥劑師，繼而令佢有開網店賣保健品嘅念頭。雖然佢都曾經擔心過收入嘅問題，不過暫時都可以應付到。唔經唔覺會嘅網店已經創立一個月，除咗有向朋友取經之外，唔少粉絲都幫襯。網店暫時得佢一腳踢，雖然每一個部份都好難，但就好新鮮同好似捱過咗，所以佢覺得好有滿足感。至於係唔係減少幕前工作，Bella有話工作方面隨緣，不過現時都係想做生意。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！