林芊妤Coffee遇TVB渣男受情傷事業陷低潮:男人靠唔住

林芊妤Coffee遇TVB渣男受情傷事業陷低潮 悟女生需獨立:男人靠唔住

林芊妤(Coffee)近年主力教授瑜伽及KOL工作,創立瑜伽服裝品牌,社交平台充斥與老公翟志榮及囝囝伯伯嘅生活日常,可謂事業、家庭兩得意。日前,佢就喺YouTube個人頻道分享自己過往過份依賴愛情,後嚟遇上現任老公先學識獨立自主嘅故事,著各位女生要愛自己,有自己嘅人生;網民紛紛留言表示欣賞,認爲喺Coffee身上見到一份光芒。

Coffee分享,由於喺福建家庭長大,由細到大都被灌輸「男主外,女主內」觀念,每次拍拖佢都覺得男朋友有責任照顧自己,又成日黏住對方變得好倚賴:「我自己就變成咗一個愈嚟愈小鳥依人,或者覺得自己係一個一無事處嘅女仔。」提到其中一名前男友係TVB同劇演員,當對方北上發展,就覺得娛樂圈複雜,又唔想Coffee拍攝親密戲份,所以要求佢離開TVB,二人因而鬧分手,Coffee形容當時「瘦到得返排骨」;基於愛情,佢選擇遷就對方,承諾減少工作量,陪同到內地專心經營二人感情,不過最後仍分手,Coffee暗示係對方有第三者。

之後Coffee返到香港少咗好多工作機會,佢先醒起朋友曾勸告:「事業同金錢係你自己㗎,你將你嘅人生投注晒喺男人身上,到你哋分開,就會一無所有。」歷過愛情低潮,Coffee明白唔可以過份依賴伴侶,一定要擁有自己嘅生活:「嗰一刻開始,我冇再focus喺我嘅愛情上面,我好努力去工作,我好努力去學瑜伽,做瑜伽老師,繼續拍劇,但係不幸地又發生咗啲嘢,咁我離開咗TVB,當時我真係決定我要做老姑婆啦!我話畀自己聽我唔可以再靠男人,因為男人靠唔住。」

及後Coffee認識到現任老公,表示對方相信男女平等,尊重私人時間,不過Coffee覺得二人差異好大,存在不安感,懷孕後決定結婚,Coffee主動提出婚前協議,希望對方負責小朋友學費及居住地方嘅費用,佢同老公解釋指:「我希望我嘅錢唔係淨係奉獻畀屋企,我都希望我儲到少少錢,因為呢個會成為我嘅安全感,如果我哋第時有咩事,我都希望我可以自立。」Coffee分享婚後老公對佢好好,又鼓勵佢追求夢想,二人財政獨立,平起平坐,指自己努力賺錢自己用,反而男人會更珍惜咁樣嘅女仔,即使將來分開,仍能獨當一面。Coffee最後表示每一位女性都值得被尊重同愛護,不過同時需增值與愛錫自己:「要令男人離唔開我哋,而唔係我哋哀求佢哋唔好離開。」

影片截圖
影片截圖
影片截圖
影片截圖
影片截圖
影片截圖
林芊妤
林芊妤
林芊妤
林芊妤
林芊妤
林芊妤
林芊妤
林芊妤

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!