林芊妤Coffee拍片揭第二胎染色體有異常 檢測報告獲好消息
林芊妤（Coffee）與圈外男友翟志榮於2018年結婚，育有一子翟德彥（伯伯），不時於社交平台大晒幸福生活。早前Coffee喺社交網站宣布懷孕4個月嘅消息，不過佢喺個人頻道上載影片表示肚內BB喺進行無創胎兒DNA「T21測試」時，發現第13號染色體或異常（帕陶氏症），通常伴隨多重嘅生理缺陷，甚至有可能或活不到1歲，令Coffee哭成淚人。
喺前日（7日），林芊妤再度拍片交代肚內BB嘅情況，佢除咗多謝大家嘅關心同支持之外，佢表示自己都聽咗好多有類似經驗嘅媽媽分享。
Coffee喺美國一家公司再做檢測，由於兩個檢測都係同一個技術，而佢哋嘅結果都係一樣，所以佢都話自己已經打定輸數。佢嘅醫生推薦佢去照結構，照完之後醫生就表示懷孕三至四個月已經可以照到7至8成，並叫Coffee放心，因為T13好容易睇到，因為小朋友係會有嚴重嘅障礙及身體多個部分會顯示有問題，而醫生喺照嘅過程一路表示BB冇問題，腦部、血管流、眼睛、鼻子、耳朵及身體都冇問題。
雖然醫生表示BB冇問題，不過Coffee依然有憂慮，擔心BB去到5至6個月啲問題先至出現，醫生就向佢解釋表示唔會，因為基因好早形成及冇得改變，呢番說話幫Coffee打咗強心針。同時，Coffee喺懷孕三個月嘅時候已經預約抽羊水，因為想盡最後一刻，知道BB係冇問題。同時佢又話自己喺做T21進階版嘅時候，已經抽血做咗66樣罕有疾病嘅檢查，好消息就係BB所有嘢都冇事。另外，Coffee亦有做Panroama測試，而結果亦顯示BB喺所有項目都係低風險，醫生同佢解釋即係BB無事。
影片出街後，唔少網民都表示好開心有好消息，例如「好開心聽到你嘅好消息，明白你嘅心情，一個BB要健康出生、長大成人真的一點不容易，所有野都像奇蹟一樣，希望你嘅心情會慢慢平伏。同埋喊並不代表示弱👍🏻」、「辛苦妳了。想喊就喊，唔需要強忍呀。接納自己的情緒都係好堅強嘅表現❤❤。」、「Coffee, 我作為兩個孩子的媽媽，非常明白你的感受。問多幾個醫生嘅意見，才決定抽唔抽羊水。放鬆心情、努力、加油。祝你和B B身體健康。💜💜💜」、「Coffee真係好勇敢！B B無事啦！B B平安健康了！希望B B健康平安出世！😊」、「有好消息實在太好啦！Coffee加油💪要stay positive❤相信BB一定可以平安健康咁出世 相信一切係最好嘅安排💖」、「一切會有最好嘅安排，你係善良嘅人，上天會眷顧你同BB❤」、「恭喜你呀Coffee，希望你同BB嚟緊都會一路收到好消息，平安健康咁出世🩷」及「恭喜🎉終於放心了！要放鬆心情好好養胎準備迎接健康的二寶」等等。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
