查小欣專欄批《ERROR自肥企画》低俗不雅 網民：搏上報

ViuTV綜藝節目《ERROR自肥企画》遊戲尺度大膽又有創意，自開播以來深受觀眾歡迎網上討論程度爆晒燈。除咗ERROR成員何啟華（阿Dee）、梁業（肥仔）、郭嘉駿（193）及吳保錡人氣飆升之外，連帶幕後團隊「無制限OT編集団」嘅「格仔導演」Mike（劉諾衡）、導演Agent. L（曹梓冲）、助理導演Sunny（方震揚／Rain. P）及撰稿阿暉（麥可暉）亦獲得網民高度關注。日前自稱「娛樂教母」嘅查小欣喺娛樂專欄中以「ViuTV的社會責任」為題，點名批評《ERROR自肥企画》。

喺文中，查小欣首先指自己經常早出晚歸，所以只有時間去無綫OTT平台睇劇集《伙記辦大事》和《逆天奇案》，後來因朋友不斷催促下睇咗《ERROR自肥企画》。睇過《ERROR自肥企画》後，佢指「節目被形容為綜藝搞笑，但糖衣包裹着的是大玩低俗、不雅的內容，有些畫面更打了格仔，節目列明為「M成人觀眾」類別，可能只是噱頭，為吸睛的包裝手法，真實未必有三級鏡頭，但有不良意識之嫌。」之後，佢指ViuTV係一個入屋嘅免費電視台，一定要有社會責任。最後佢仲反問「經常向廣管局投訴電視節目低俗、玩過界、有植入廣告的電視迷，為何沒反應？是出於包容？有雙重標準？還是沒看這節目？」

專欄一出後，引起網民熱烈留言討論，例如「過晒氣無野撈，唯有惹下火頭博下關注」、「學人講社會責任?爆足一週返黎未?」、「思想咁落伍」、「明眼人都知佢係過咗氣㗎啦，人做狗仔隊佢做狗仔隊，好心佢學下盧覓雪啦」、「過氣娛樂圈枯草，過主啦」、「佢仲有咩影響力」、「Do姐為咗mirror夜訓 高下立見」及「過曬氣出嚟抽水搏上報」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！