栢安妮囡囡許恩怡 17歲出道作拍內地名導歌舞片

又多一個星二代入行！80年代混血女星栢安妮嘅17歲囡囡許恩怡（Natalie），原來已經悄悄走入娛樂圈，首套參演電影作品《燃野少年的天空》由內地名導張一白執導，有跳舞底子嘅Natalie飾演追尋夢想嘅少女小黃。

三歲便開始學舞嘅Natalie，先後接受古典、芭蕾舞、現代舞等舞蹈訓練，細細個已經完成所有皇家舞蹈學院分級同職業考試，2019年參加香港演藝學院年度傑出⻘年舞蹈家計劃。舞蹈之外，Natalie 仲接受武術訓練，學過劍術、⻑拳、太極等。

仲讀緊中學嘅Natalie 從未拍過電影，媽咪栢安妮搵到份屬友好、曾經捧紅Angelababy、熊黛林同水原希子嘅經理人Kim Chou肩負起經理人工作，照顧世姪女Natalie。有強勁後台之外，《燃》導演張一白認為相中Natalie，就係貪佢冇經驗。「我就是擔心由職業舞蹈員來演出不夠自然；所以當我從好友給我看的視頻中，第一眼看見跳蹦蹦跳過欄杆的她，一臉自由自在，活潑的模樣，當下我就決定小黃一角非她莫屬。」

Natalie媽咪栢安妮上世紀80年代亦都係因為學過溜冰，而被黃百鳴睇中邀請拍戲。栢安妮拍過廿幾套戲，同過張國榮、梁朝偉演對手戲，作品包括《為你鍾情》、《風塵三俠》等。栢安妮入行前本來俾英國牛津大學取錄，後來佢喺1993年息影轉投商界，之後再重返校園，現時成為兒童職業治療師，並創立科技公司開發協助兒童改善專注力不足等狀況嘅遊戲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！