梁思浩爆天王巨星割雙眼皮前問佢意見 鄧兆尊自爆被祥嫂捉去動刀

近年醫美盛行，莫講話藝人，咩人都可以變靚。梁思浩同吳家樂主持嘅網上節目《娛樂好好玩》就提到整容話題，嘉賓主持鄧兆尊自爆被阿媽祥嫂（洪金梅）捉去動刀！

鄧兆尊憶述多年前被阿媽祥嫂帶去「街口」做手術，「我係瞇埋眼，醫生揸住支筆畫咗嗰條界出嚟，落刀落到咁樣，我話『咁深？』，阿媽仲話『畫深啲啦，橫掂都俾咗錢，畫深啲！』我話『醫生，做人嘅嘢有報應㗎。』，佢話『你放心啦，畫落去係咁啫，我識做㗎喇，喺呢度焫一焫得㗎喇，唔覺㗎。到時你腫咗好返都係咁上下。』咁先救咗我一命。」，兆尊後來指佢做嘅係「聯線」雙眼皮，唔係開刀。鄧兆尊雖然已經57歲，但總算睇落唔覺，而佢其中一位女友從事醫美相關行業，甚至成日搵兆尊做白老鼠打Botox，不過兆尊自言十分抗拒。

梁思浩講起整容話題，就問身邊嘅鄧兆尊「TVB簽你有冇叫你去整容，因為佢叫我去整……」，遲過梁思浩入行嘅吳家樂就話佢地嘅年代都有叫人去整容，仲話箍牙係基本。梁思浩提到80年代出道時，曾經被TVB話佢對眼太細，後來藝員部阿頭仲帶思浩去中環搵整容醫生，提議喺眼皮開刀。「我話開完之後咁我點拍呀？『好快㗎咋，兩個月』，我話我隻眼會唔會變大？佢話冇變大，不過變咗雙眼皮啫。」梁思浩指剛剛入TVB時人工只得3千蚊，但整容手術要萬二蚊。梁思浩於是同藝員部講要整的話就由TVB埋單，但藝員部拒絕，於是梁思浩索性唔整雙眼皮。

梁思浩之後再爆料話，同一位天王巨星識於微時，多年前「天王」想割雙眼皮，並問佢意見。思浩笑言當年同「天王」做過一件低能事，就係攞把間尺篤入去眼皮，「模擬」割雙眼皮效果。「我哋嗰時冇雙眼皮膠紙，我話篤咗入去之後唔好郁，睇吓係咪靚啲？係靚啲喎，佢就係俾我咁樣說咗，佢就決定『咁好啦』」。思浩指對方割完雙眼皮之後事業運一躍而起，而旁邊嘅吳家樂就哼住黎明嘅《夏日傾情》有所暗示，梁思浩否認當事人係Leon，但就提水話嗰位「天王」冇唱歌，主力拍戲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！