梁競徽接受內媒訪問 指喺內地感受真正自由 將來或送囡囡北上讀書

原名梁烈唯嘅梁競徽近年轉戰內地市場搵人仔，更只會在微博和抖音分享日常生活及展現愛國嘅心。日前佢接受內地傳媒訪問，期間大講修例風波時所受嘅委屈、考慮將囡囡送去內地讀書、內地有好啲嘗試新角色嘅機會及喺內地感受到真正嘅民主。

喺訪問中，梁競徽講到早兩年修例風波時所受到嘅委屈，話當時係佢最艱難嘅時候，每日都留喺屋企唔敢出門口，令佢感到非常彷徨同無助，更一度諗過轉行。雖然當時係好孤獨，不過就算再嚟一次，佢都會選擇發聲。佢仲話自己係一個唔會講假話嘅人，喺愛國問題上更加唔會含糊。至於對祖國嘅感情，徽徽就話係自細受爸爸嘅影響，因為爸爸從小就告誡佢無論喺邊度，去到邊都要記得自己係中國人。

之後，佢亦講到自己係一個好倔強嘅人，人哋越講祖國唔好，佢就越要解歷史入面搵出證據，咁樣就可以證明俾人睇個事實。佢仲話喺佢嘅角度嚟講，西式嘅所謂「民主」只係口號，真正嘅「民主」係要以人民的生活為中心，而佢喺內地就可以睇到切實行動。

徽徽與老婆Tina育有4歲囡囡及1歲囝囝，佢當然有教小朋友愛國觀念啦！佢話有一年嘅國慶，佢同囡囡喺屋企睇閱兵儀式，佢同囡囡講每次聽到國歌響起時，都要企起身表示尊敬。囡囡除咗記喺心入面之外，佢仲學埋閱兵步操。另外，佢亦考慮將來送囡囡去內地讀書。

話晒徽徽都已經北上發展幾年，所以佢話已經適應咗喺內地嘅生活，去到邊都唔使帶袋，只要一部手提電話就可以搞掂所有嘢。喺社交媒體上，佢亦可以暢所欲言咁去表達自己嘅真實想法，唔會擔心被人抹黑同埋敵視。佢喺內地可以感受到真正嘅自由。佢仲話喺香港嘅時候，佢成日覺得自己來來去去都係演嗰啲角色，去到內地之後佢有好多嘗試新角色嘅機會。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！