梅啟明入稟告《梅艷芳》侵權 梅媽發最後通牒指不撤訴訟斷絕母子關係

·2 分鐘文章
《梅艷芳》
《梅艷芳》

電影《梅艷芳》將梅姐傳奇嘅一生重現大家眼前,電影上映以來叫好又叫座。電影除咗得到歌影迷高度關注之外,連梅姐胞兄梅啟明亦有留意,上星期佢更入稟高等法院,指自己擁有「梅艷芳」及「Anita Mui」商標,而該電影未得其同意就使用有關商標,所以佢要求投資呢部戲嘅電影公司對佢嘅損失作出賠償。梅啟明呢個舉動連一向撐佢嘅梅媽覃美金都反對,發聲明指自己毫不知情及唔同意佢嘅做法,仲鬧爆佢「財迷心竅」。

去到噚晚(7日),資深傳媒人潘小文喺網台節目《D100娛限奶媽》中話自己同梅媽通過電話,期間梅媽就話好後悔當日咁縱個仔,覺得佢太唔長進同太揮霍,所以梅媽決定對佢進行「經濟封鎖」,唔再比錢佢。至於對阿仔入稟告電影公司一事,潘小文就話梅媽指當時電影公司邀請佢做顧問,梅媽冇向電影公司提出索取金錢,只係要求電影唔可以有侮辱梅姐嘅內容。梅媽唔單止反對大仔梅啟明今次嘅控告行為,亦透過潘小文嘅節目向佢發出最後通牒,話如果佢不撤訴訟嘅話,就會與佢斷絕母子關係。

節目播出後,有網民就唔相信梅媽並指佢哋兩母子鬼打鬼,留言話:「晒氣啦。扮晒野。當年點解要拎亞梅d私人物品拍賣呀。又係你仔迫你架?」、「利益行先 ? 兩母子鬼打鬼 ?」及「唔信梅媽,唔信梅媽,唔信梅媽。小心梅媽想自保怕輸梗既官司,所以扮割𥱊。」等等。另外,亦有網民支持梅媽呢個決定並留言支持,例如「相信梅媽經過多年打官司的失敗現都回頭是岸;盼望佢唔好再縱容呢個衰仔…好好過埋人生下半埸!」及「佢老母終於都講返句人話」等等。

《梅豔芳》海報
《梅豔芳》海報
《梅豔芳》劇照
《梅豔芳》劇照
《梅豔芳》劇照
《梅豔芳》劇照
《梅豔芳》劇照
《梅豔芳》劇照

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能