梅啟明搵梅媽為兒子籌醫藥費 梅太踢爆老公唔肯去大馬探個仔

已故天后梅艷芳嘅大哥梅啟明，近年上得新聞嘅原因都係同錢有關。梅啟明早前又喺街頭見記者，聲稱梅媽（覃美金）被照顧多年嘅看護及孫仔梅柏麟軟禁，又自爆佢同馬來西亞嘅太太所生嘅13歲仔Richard，早前頸項出現腫瘤，於是想搵梅媽拎醫藥費，但未能見面。

梅啟明太太Joey回應傳媒時，證實Richard的確出現健康問題。Joey懷疑仔仔同佢去年初嚟香港搵梅啟明算帳時，承受巨大家庭壓力，後頸開始腫痛。今年4月，Joey母子趁大馬開關返國，Richard嘅腫脹仍然未消，睇咗醫生都未知原因，而家等緊化驗結果。Joey不滿梅啟明喺Richard病因未明時借題發揮，又爆梅不願意到大馬探望兒子﹐推搪話係冇錢買機票。

Joey又批評梅啟明不負責任，要梅媽俾Richard醫藥費，又心痛兒子患病都得唔到爸爸關心。

已婚嘅梅啟明去年被爆搭上泰籍情婦，Joey帶埋Richard去香港處理家事。Joey曾向傳媒提供電話錄音片段，揭示被梅媽登報脫離關係嘅梅啟明，打電話騷擾梅媽攞錢，又想用Richard過橋，喺疫潮期間「探」梅媽。梅啟明更加以「納妾」為由向梅媽索取禮金，又稱泰籍女友有法力可以令梅姐上身，荒謬無極限。

梅媽登報以外亦正式「閂水喉」，一直住私家醫院迴避個仔嘅佢，趁北角寓所租約完，將梅啟明踢走。梅媽並且同看護及孫仔梅柏麟搬到荃灣新居，而梅啟明早前喺街頭見記者嘅位置，正是梅媽新屋附近。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！