梅小惠憶與曾偉權分手瘋狂購物兼體重跌至98磅

好耐無見嘅梅小惠近日回歸電視圈擔任製作總監，小惠喺2004年拍完《皆大歡喜》後就冇再拍劇，慢慢淡出幕前並轉行巿場推廣。隔咗十幾年，佢返嚟電視圈做製作總監，第一次就搵兩位好友阮兆祥及黎耀祥製作《雙祥見》。近日佢接受商台主持人梁泰來邀請做《1圈圈 星光背後》嘉賓，當中談及佢嘅演藝事業及感情事。

當年梅小惠與周星馳（星爺）合作拍劇集《蓋世豪俠》、《公私三文治》及《他來自江湖》，小惠話同星爺拍劇讀熟晒劇本係冇用，因為去到先知拍咩，好似扮樹嗰場戲係根本冇對白，所以同星爺合作係練急才。

至於梅小惠同趙學而嘅不和傳聞，有傳當年二人拍攝《皆大歡喜》時因遲到而傳出不和，小惠更因此離開劇組及淡出幕前。小惠就話佢哋之間冇不和，而佢自己亦冇遲到，《皆大歡喜》一班演員合作咗好多年，有開心亦有磨擦，而佢離開幕前係感覺自己年紀已經唔細，想進步及挑戰自己。

至於感情方面，小惠與初戀男友曾偉權於1986年合作《滿堂紅》認識並相戀，二人拍拖13年可惜未能開花結果。曾偉權於上年11月底因癌病離世，小惠就話一路以來都好感激曾偉權由佢21歲開始對佢嘅保護，令佢冇被人呃同可以專心工作。雖然到最後要分開，但都唔係單方面嘅責任，可能佢自己都冇做好。曾偉權曾經講過小惠想結婚，而佢希望喺事業上再拼博，導致二人出現分歧而分手。小惠坦言大部份女仔拍咗拖十幾年都會想結婚，而分手後小惠大受打擊，曾瘋狂購物兼體重跌至98磅。最後，小惠表示佢事前唔知曾偉權患癌，佢離世嗰日，家姐仲問佢有沒有收到消息，佢當時同客戶開緊會。去到第二日記者確認佢離世嘅消息，小惠好感激曾偉權令佢有一晚去回憶對佢嘅好，令佢可以自然真心回答大家。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！