【森美大哥好波！】為《返工》旁白完美道出打工仔辛酸

超強颱風「山竹」吹襲香港，星期一路面塌樹未清理好，造成交通大癱瘓，雖然特首叫僱主僱員互諒互讓，一班打工仔都要千方百計「搵路」返工，唔少打工仔都覺得好無奈同一肚怨氣。有創意網民將一個打工仔面對住塌樹嘅相P成電影海報，甚至有人將片段剪接，將戲名叫做《返工》（Working after hurricane），主演者係「香港打工仔」。

喺噚日，森美小儀所主持嘅《早霸王》節目Facebook專頁上載名為《返工》嘅預告片並留言寫上：「史上最大規模港產片。聽講片尾出演員Credit都出咗三粒鐘。全實景拍攝，走特技，走人情味，狠狠地將山竹過後嘅香港一一紀錄！去片！！！！！」預告片內容係「山竹」吹襲期間嘅畫面及打工仔返工等搭車嘅苦況，加上森美有血有淚嘅旁白，完美道出打工仔嘅辛酸！

旁白內容如下：
打風你好驚，打完仲恐怖，《返工》－ 香港史上最血肉嘅史實，700萬市民打造7小時擠擁實境，6個鐘先出到旺角？月台上面全部係人？候車大堂全部人？售票處全部人？成條街全部人？前世未見過咁多人！唔怕成條馬路都係樹，孭個背囊跑返工。《返工》！噚日盛大公映。未試過提早出門口，返到公司竟然啱啱夠鐘放工，多次勇奪準時勤工獎香港打工仔傾力主演，貼心老闆互諒互讓全力互航。文員、Sales、設計、會計、公關全情投入，平時半個鐘，而家塞到懵，9月17號全城返工！本片青少年及兒童遲啲到你！

預告片公開後，引起網民熱烈討論兼踴躍留言：「大哥抵讚」、「聽到拍晒手掌」、「笑中有淚」、「好好笑但同時好無奈」、「呢幾分鐘盡顯森美功架！」、「我笑到肚痛！香港人真係創意無限無得頂！」、「果然有血有肉，最尾嗰句先至最恐怖，遲啲會唔會拍續集！」、「全片一個霞姨都無，全部自發性傾力演出，反映出香港打工仔真的很盡責！」等等。