楊思琦車禍獨自入院 網民: 疑點重重

楊思琦早前發生交通意外送院治理，佢復工接受訪問時就話宜家都仲有頭痛，要食止痛藥，同埋因為拉傷咗頸椎，要接受針灸同西醫治療。楊思琦透露當時車禍細節，指駕車期間遭一輛大貨車以極快速度衝出撞倒：「當時阿女、阿仔和媽咪成車人，我比較嚴重點，阿女都撞傷手，安全氣袋彈出時有粉沫和氣味，阿女都嚇到喊，而平日她習慣將頭挨住車窗，幸好當時她沒這舉動，真的很好彩！」

由於當時肇事貨車司機逃去遺下空車，所以有網民偵探上身咁就覺得事情充滿疑點，例如貨車傍晚時份都會裝貨，翌日送抵貨物，但撞到楊思琦嗰架貨車反而無貨喺入面，同埋司機唔係行一條正常道路，網民懷疑呢次意外係有人刻意安排云云。

楊思琦喺2012年突然宣佈誕下囡囡楊卓穎，但就拒絕透露其經手人身份，只係承認個女跟自己姓氏。2020年楊思琦再度懷孕誕下兒子Kody，當時承認自己已同圈外人喺美國註冊結婚，但一直都無公開呢位圈外人身份，就連相都無分享過，令唔少網民都指佢嘅另一半係「虛擬老公」，一係呢位「虛擬老公」就另有家室?!

雖然楊思琦多次表示自己無講大話，最近又否認兒子跟佢姓楊，強調老公只有佢一個太太：「我從來沒說兒子姓楊，記者亦沒有問過我，不過我亦不會講他的姓，我的性格是不會主動澄清。他肯定只有我一個老婆，如果有第二個，他死硬。」但網民仍然對楊思琦老公從未曝光呢點抱有懷疑，因為就連呢次車禍咁大件事，楊思琦都係自己住院，「虛擬老公」亦無現身過，接受訪問嗰陣被問到受傷期間老公點照顧佢，楊思琦就話老公有安慰佢，但佢態度就好避忌，表示呢個問題好難答。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！