楊思琦「硬頸」:呢個問題好難答

東方日報
·2 分鐘文章
楊思琦「頸梗梗」,自爆要食止痛藥開工。
楊思琦「頸梗梗」,自爆要食止痛藥開工。

楊思琦早前發生交通意外入院,傷後首度復工的她要靠服食止痛藥治療不適,當被問到其「隱形老公」時,她似有難言之隱說:「呢個問題好難答。」耐人尋味。

楊思琦上月底揸車時遭另一部車欄腰撞擊,發生意外後被送院留醫,休息了多天的她,昨日亮相ViuTV新節目《中女唔易做》,現場見她頸梗梗,並說:「頭暈咗3、4日,依家都仲係頭痛,要食止痛藥,2星期後要覆診,我有做針灸中西合璧治療。」她指女兒都嚇親,而她因受傷取消了工作,亦有所損失。

問到老公可有呵番?她即有點避忌,竟指這問題「好難答」:「因為我頭痛瞓唔到,佢有安慰,頭痛就幫唔到我。(幫手照顧仔女?)屋企人有幫手。」節目中她化身「散打王」,一人兼做幾份工包括珍珠奶茶店、花店、水果店和派傳單,選港姐後她只打過電視台一份工,笑言今次打工打得最多。

康子妮學鄉音做侍應

節目中除了思琦,小儀、康子妮、趙學而、朱薰和杜如風亦有參與拍攝,康子妮出任麵店侍應,又即場示範模仿落單「姐姐」的鄉音,十分搞笑,她說:「如果刻意學係好難,搞到我好緊張,練咗一陣就即刻拍。最難係落單『墨魚丸』變『勿魚丸』、『酸菜』變『先菜』。」她還要調校飲品和洗碗,表示在麵店「洗到冇停手」。小儀則做了2日農夫,最難忘是如廁時被四腳蛇嚇到大叫,又透露收割時甚為蝦碌,好菜變爛菜。

康子妮表示在麵店洗碗、落單、沖飲品一腳踢。
康子妮表示在麵店洗碗、落單、沖飲品一腳踢。