楊茹庭打造夢幻教育王國

·4 分鐘文章
砌LEGO由零開始,楊茹庭希望藉此啟發小朋友的創意思維。
砌LEGO由零開始,楊茹庭希望藉此啟發小朋友的創意思維。

波爾錶太子女楊茹庭進軍教育界,頭炮已豪花七位數字開設從遊戲中學習的教育中心,啟發小朋友的創意小宇宙,而第二波將於下月開設不同課程的教育中心,打造她夢想中的教育王國。

家族主力做腕錶生意的楊茹庭(Sean),近年積極擴展不同範疇的生意,繼金邊房地產、鮑魚專門店及開餐廳後,現進軍教育領域。她在疫情下於淺水灣商場開辦她的首間教育中心EAV Education House,店舖佔地二千呎,設計七彩繽紛,內外布置似足一間糖果屋,主要教LEGO®Education及玩SLIME「鬼口水」。

裝修費過百萬元

Sean帶同兩位契女陳家瑜(Victoria)及陳閔閔(Chantelle)到中心一齊玩,兩個小朋友雖分別只有11歲及8歲,但已是中心的小導師,玩SLIME出神入化。Sean對契女疼愛有加,開設這店舖除因家族在內地一直有辦教育,希望在香港繼續推行教學外,契女亦是原因之一,她說:「兩個契女本身好鍾意玩,成日喺屋企玩鬼口水,開番間畀佢哋,又可以同小朋友、同學仔一齊玩,一齊開心。中心裝修咗七位數字,有啲物料由美國專程訂返嚟。(店舖設計好繽紛?)係,我哋想啲小朋友有好開心嘅氣氛,佢哋入嚟玩,可以過好輕鬆、愉快一日,最終目的係佢哋行出去係樂而忘返!」

新中心陸續有嚟

Sean與朋友合辦教育中心,原來已籌備兩年,本來去年十二月開業,因為社會情況及疫情關係,將計劃延遲了半年,雖然只是新開業,反應已十分理想,她說:「反應好好,可能小朋友困得太耐,之前又冇學返、冇出街。呢度地方空曠,出面又係沙灘,小朋友行完沙灘可以入嚟玩。呢間係我哋第一間教育中心,嚟緊仲有一連串教育計劃,會喺黃竹坑開第二間,嗰度會有多啲教育方面嘅課程,好似英文拼音、普通話、西班牙語、英文話劇、Modelling、K Pop舞蹈、瑜伽等,好多唔同嘅範疇,最主要係想小朋友學多啲嘢,而唔係好死板咁讀書,畀佢哋有唔同方面嘅發展。(幾時開業?)希望八月可以正式開學,已物色唔少出名嘅導師。」

啟發創作及思維

問到最終目標是否打造理想中的教育王國?Sean說:「都會想,最重要將小朋友教育得有希望,唔係只係讀課本、數學、英文,要有唔同諗法,喺遊戲之中可以啟發佢哋嘅創作及新思維。」

嚴選安全「鬼口水」啱晒包場Party!

如果你未接觸過SLIME「鬼口水」,可能會覺得這玩意有種黐立立的感覺,但它是近年小朋友最愛的玩意,風靡全球,除可自製不同顏色外,中心還提供超過100種配件供大家DIY,配件全由外國精選而來,Sean說:「作為父母,仔女嘅玩具最着重安全性,我哋嘅SLIME材料成分絕對安全,唔傷手亦冇有毒物質,父母可以放心畀小朋友喺呢度玩,完全唔使擔心!」中心還提供「包場」服務:「呢度可以搞SLIME派對,包場約埋同學仔一齊玩,我哋仲會做網上即時直播。依家啲小朋友好多時間用喺書本上,適當嘅玩樂可以幫佢哋減壓,培訓創造力。」

融合STEM理念衝出國際

中心除了SLIME DIY幫助小朋友釋放壓力、培訓創造力之外,LEGO®Education更能啟發小朋友的創意,是融合STEM理念,以年齡分組,由專人小班教授,以有趣和互動方式提升小朋友對科研的興趣。Sean說:「STEM包涵Science、Technology、Engineering同Mathematics,我哋以LEGO形式去學習,砌LEGO由零開始去組合,例如可以砌架車出嚟,再喺平面電腦上教佢哋程式,令架車會郁動。我哋由3歲至11歲,分三個唔同年齡層,由淺入深幫助小朋友腦部發展,而讀到最高級時,仲可以去參加國際性比賽。」

小朋友在安全環境下玩樂,是家長最重視的條件。
小朋友在安全環境下玩樂,是家長最重視的條件。
在契女Victoria的指導下,大人玩鬼口水一樣咁開心。
在契女Victoria的指導下,大人玩鬼口水一樣咁開心。
契女愛玩鬼口水,啟發楊茹庭開設這間中心。
契女愛玩鬼口水,啟發楊茹庭開設這間中心。
學習不僅是課本裏的東西,從實踐中探索同樣重要。
學習不僅是課本裏的東西,從實踐中探索同樣重要。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能