楚撚記新line!荃灣新開餃子店 必試黑松露什菌餃+香煎潮汕韭菜粿

餃子控注意喇!荃灣最近新開一間餃子店,係人氣小菜館楚撚記大排檔嘅新line,店舖正正位於楚撚記嘅地面,暫時只做外賣生意,可以買煎好嘅同生餃都得,不過好快就會有埋堂食㗎喇~餐廳主要供應創意煎餃、手工點心及老火靚湯,每日新鮮人手製作,誠意滿滿!

創意煎餃
創意煎餃

香煎潮汕韮菜粿($10/個)

韭菜粿係潮汕特色小食,香氣濃郁嘅韭菜餡配上煙韌嘅皮~呢度嘅水晶皮同樣做得煙韌有厚度,而且於韭菜餡內加入蝦米增加鮮味,令味道生色不少!

香煎潮汕韮菜粿($10/個)
香煎潮汕韮菜粿($10/個)

手工水晶包($8/粒)

水晶包都係自家手工製作,外皮同樣做得出色,皮薄晶瑩剔透,餡料就有四個選擇,包括抺茶、紫薯、奶皇及麻蓉,抺茶香甜回甘,麻蓉芝麻香氣突出,唔會過於甜膩~除咗水晶包,仲有傳統蓮蓉餡及新派奶皇餡嘅壽包選擇!

手工水晶包($8/粒)
手工水晶包($8/粒)

自家製餃子($30/6隻)

餐廳一共供應十款口味嘅餃子,款款都皮薄餡靚,而且口味都好特別,坊間比較少見,配埋自家製辣醬、辣菜脯及陳醋食仲正~好似韓式泡菜牛肉餃,帶有泡菜嘅辣同酸,惹味得嚟好開胃,食多幾隻都無問題。黑松露什菌餃加入蘿蔔及木耳等食材,最重要係黑松露味好突出~

自家製餃子($30/6隻)
自家製餃子($30/6隻)

另外一款較特別有蝦米香菇翠玉瓜豬肉餃,爽脆嘅翠玉瓜配上有咬口嘅蝦米及冬菇,口感好豐富,蝦米亦令成隻餃更有鮮味,味道清新。

蝦米香菇翠玉瓜豬肉餃
蝦米香菇翠玉瓜豬肉餃

西洋菜鮮蝦豬肉餃嘅蝦肉爽口彈牙鮮甜,再帶有淡淡嘅西洋菜香氣,比例恰到好處;東北京蔥羊肉餃羊味都幾濃,啱晒鍾意食羊嘅朋友~

西洋菜鮮蝦豬肉餃
西洋菜鮮蝦豬肉餃
東北京蔥羊肉餃
東北京蔥羊肉餃
餃撚店
餃撚店

餃撚店

地址: 荃灣川龍街118號百悅坊地鋪