【樂壇頒獎禮】歷年奇怪大獎 許廷鏗 陳百祥 周潤發都拎過 TVB將張惠妹當香港女歌星

今年4大電子傳媒音樂頒獎禮，隨住今個周末嘅港台《十大中文金曲》同TVB《勁歌金曲頒獎典禮》舉行而告一段落。歷來各機構嘅頒獎結果都引來公眾議論，睇返多年來嘅得獎名單，有好多獎項嘅名目都十分奇怪，好多都係為頒而頒！

度身訂造 擺明益你嘅大獎

男女歌手組合同歌曲獎，一聽就知競逐嘅項目係咩，但係新城喺2010年勁爆頒獎禮，就頒發分別名為「新城勁爆安哥25銀禧大賞」以及「新城勁爆千嬅盛放15周年大賞」，得獎者唔駛問都知係許志安同楊千嬅啦！究竟個獎嘅意義喺邊？可能係多個獎攞囉。之後嗰年新城重施故技，再頒發「新城勁爆Twins相愛十年大獎」……得主唔係Twins唔通係Cookies 咩？！

但係呢個咁有創意嘅玩法，原來新城並非始作俑者，號稱計播放率嘅商台，早喺1988年叱咤樂壇流行榜頒獎禮上，就頒過「叱咤樂壇Very Nice大獎」，得主係周潤發，因為嗰年發哥有套戲叫《大丈夫日記》，同名主題曲唱咗好多次Oh Very Nice，可能大會想搵個理由請發哥上台開金口。個獎有咩準則就咪鬼理啦，反正之後冇再出現過。

新城獎項「量化寬鬆」 名目估你唔到

多年來新城都話要「大派禮物」鼓勵歌手，於是獎項數目越整越多，除咗增加得獎人數，就梗係要搵啲名目加獎啦。2000年勁爆頒獎禮就有「形爆男／女歌手」獎，分別由許志安同王菲奪得……但係同音樂有咩關係呢？

到2013年又有「新城勁爆學生眼中最健康偶像」，得主係許廷鏗，都係嗰句︰同音樂有咩關係呢？而2014年嘅「新城勁爆新媒體歌手」得獎者係吳若希。到底因為吳若希喺網上多人講多人聽，定係佢嘅團隊善用新媒體宣傳？唔知lu～

十大中文金曲 都有「泵水」嘅時候

港台嘅「十大中文金曲」向來都係正正經經，獎項變動唔大，最多都係加入「全國」、「全球華人」呢啲宏大到渺無邊際嘅類別。但係喺1995年嘅第18屆，嗰年可能新人太多獎項分唔勻，除咗固有嘅「最有前途新人獎」以外，仲加插咗最佳舞台表現新人（陳慧琳）、最佳歌唱技巧新人（陳潔儀）同最有音樂才華新人（Zen）。

同一屆又整咗個「九五年度慈善大碟獎」，頒俾嗰年唱《我至叻》嘅陳百祥。當年收錄呢隻歌嘅唱片，將收益撥捐公益金，於是港台咪表揚下囉。

TVB將張惠妹列為香港女歌星

近年TVB勁歌頒獎禮由TVB藝員同星夢玩晒，賽果出人意表就梗架啦。不過早喺《1998年度十大勁歌金曲頒獎典禮》上，亞太區最受歡迎香港女歌星得主係……張惠妹。呢個賽果震撼90億人！咦？阿妹唔係台灣人嚟架咩？

為咗表揚容祖兒連奪10屆「最受歡迎女歌手」，TVB喺2014年頒發「最受歡迎歌手十年大獎」俾佢。睇返資料，自從4大唱片公司2009年杯葛TVB之後，近乎冇對手同祖兒角逐女歌手獎，祖兒最後拎多2屆就退位讓賢，呢2屆嘅得主係菊梓喬。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！