樂觀抗癌｜彭皓鋒出PO感恩渡過患癌第二個生日 網民集氣祝福

有TVB御用惡人之稱嘅彭皓鋒（Peter），去年7月發現直腸內有一個約5厘米嘅腫瘤，證實患上直腸癌第三期，但因腫瘤位置接近肛門，如果接受切除腫瘤手術，有機會終身背著造口袋，對家人做成負擔，所以暫無開刀打算。現時與腫瘤並存嘅佢，一直保持積極心態，積極面對治療。喺噚日（20日），佢喺社交網站出PO上載慶祝54歲生日嘅照片，感恩自己渡過患癌嘅第二個生日。

噚日，彭皓鋒喺社交網站上載一張自己拎住生日蛋糕嘅照片，並留言話：「發現癌症第13個月的第二個生日，珍惜和家人的每一天，感恩現有的一切，開心每一天，願身邊所有人健康快樂。」唔少網民都紛紛祝佢生日快樂、身體健康及叫佢加油。

彭皓鋒自證實患直腸癌後，佢選擇生活入手增強自身體質，例如戒甜食及保持清淡飲食。另外，佢亦保持積極心態面對病情，並發現專注力可以幫助佢減少不適，好似佢早前到馬來西亞拍劇，但因腫瘤嘅訊號影響，而每一去10次廁所，不過佢發現專注工作可以減少不適。

彭皓鋒現時處於觀察階段，腫瘤喺初期發現時係5點幾厘米，去到今年一月就大至8點幾厘米，最近就縮小至7厘米，佢希望腫瘤再細啲，咁就可以進行手術。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！