雅虎香港新聞 樊亦敏 《殺手》飾武功高強社團阿嫂 打戲親身上陣 網民大讚演活角色
樊亦敏今年49歲喺處境劇《愛·回家之開心速遞》飾演潑辣「三太」白天娥，講嘢尖酸刻薄，演技搞笑啜核，深得觀眾愛戴。另外，樊亦敏喺熱播中嘅《殺手》飾演一名武功高強嘅霸氣社團阿嫂「紅姐」萬天紅，面上一道長疤痕，再濃妝都遮唔到，一身殺氣造型加上衣著，真係一睇就知唔好惹啦。
雖然樊亦敏年紀唔輕，但為咗做好《殺手》紅姐一角，佢好多打戲都唔用替身，選擇親身上陣，最後搞到周身瘀傷，不過係好值得㗎！因為佢真係做到入型入格，觀眾都睇到佢嘅努力。唔少網民都喺佢社交網頁留言讚佢，例如：「紅姐好厲害哦」、「殺手造型好靚」、「好勁呀紅姐！」、「Amy 好好身手👍!不過都要注意身體🤗」、「睇到都痛😢 ....欣賞你的努力🙌😍」及「敬業樂業，但都要小心D❤️❤️」等等。
樊亦敏早年曾經喺日本留學，細細個係行女神路線，未入行已拍攝多個廣告，例如有朱古力、飲品及快餐店廣告，超有氣質。樊亦敏喺91年參選港姐，當時被視為大熱人選，更有零死角美人之稱，入選最後五強，成功獲得「最上鏡小姐」。 樊亦敏入行後，隨即備受力捧，喺處女劇《他來自天堂》就已經做女三。後來，樊亦敏因為北上發展及身體原因離開電視圈，直到12年回流無綫拍劇後，角色多數都係兇狠巴辣，或者係巴渣嘅麻煩師奶等等，雖然都係飾演配角，不過樊亦敏都落力演出，將角色發揮得淋漓盡致。
更多樊亦敏的專訪：
