正宗潮州菜館尖沙咀開新分店 必試招牌滷水鵝肉拼盤、蟹黃脆皮海參伴柚皮

·2 分鐘文章

中菜咁多派系,潮州菜都可以話係其中一個港人最常食嘅,最近呢間人氣潮州菜館進駐尖沙咀!餐廳主打正宗功夫潮州菜,由有名氣嘅中菜大師、餐廳行政總廚許美德師傅主理,除咗供應一系列招牌菜,仲有兩款全新菜式,咁啱就嚟父親節,帶埋家人去食就至啱。

正宗潮州菜館尖沙咀開新分店
正宗潮州菜館尖沙咀開新分店

蟹黃脆皮海參伴柚皮(新菜式)($150)

每年嘅五丶六月都係膏蟹當造嘅季節,用每日新鮮生拆嘅蟹黃炮製蟹黃芡,搭配來自澳洲嘅豬婆參,每條成一斤咁重,海參用蝦米、火腿、雞腳及魚骨等食材先炆後炸,外脆內軟。最後伴以蟹籽柚皮,成道菜清新解膩。

蟹黃脆皮海參伴柚皮(新菜式)
蟹黃脆皮海參伴柚皮(新菜式)

木瓜盅燉燕窩 (新菜式)($300)

平時嘅木瓜盅燉燕窩都係甜嘅,呢度就特別啲製成鹹食,又幾有驚喜。以夏威夷木瓜搭配滋補養顏嘅印尼燕窩,湯頭屬「頂湯」,用一斤肉料煲成一斤湯再加上金華火腿汁調味,令湯頭更加濃郁鮮甜。

木瓜盅燉燕窩 (新菜式)
木瓜盅燉燕窩 (新菜式)

滷水鵝肉拼盤($118小/$168例牌)

講到潮州菜又點少得滷水,餐廳鵝隻選用來自汕頭市澄海區嘅獅頭鵝,肉質嫩滑;而餐廳嘅滷水膽有成五十多年歷史,濃淡恰到好處。滷水拼盤除咗鵝肉,仲有滷蛋、豆腐及墨魚。

滷水鵝肉拼盤
滷水鵝肉拼盤

手打魚丸津菜煲($78小/$108例牌)

湯頭用上芹菜、大地魚、豬骨及雞骨熬製而成,鮮香味濃,入面嘅魚蛋及魚片係用黃門鱔自家手打而成,好重魚味,搭配天津大白菜及草菇,吸收晒湯頭精華!

手打魚丸津菜煲
手打魚丸津菜煲

糖醋伊麵($98小/$128例牌)

先將潮州伊麵炸香,再用上湯煨煮至軟稔,再下鍋煎香至金黃色,真係少啲功夫都唔得~搭配埋糖及醋一齊食,酸甜香脆。

糖醋伊麵
糖醋伊麵

潮州蠔烙($78小/$98例牌)

傳統潮州蠔烙鮮以新鮮蠔仔入饌,先以清水輕輕浸洗,以保留蠔仔嘅原味同質感。加入番薯粉及雞蛋後下鍋煎至兩面金黃酥脆就上碟,配埋魚露食更能突顯蠔肉鮮味。

潮州蠔烙
潮州蠔烙

潮州反沙芋條 ($78)

反沙芋要好食,由揀芋頭已經好重要,以輕身為首選!同埋淨係保留芋頭中間最粉糯嘅部分製作,外脆內粉。

潮州反沙芋條
潮州反沙芋條

滿樂潮州 (美麗華廣場)
地址: 尖沙咀彌敦道132號美麗華廣場一期食四方4樓405 號舖