正露丸好大陣味點辟? 官方回應︰無辦法!

 

去旅行要帶定藥物傍身,腸胃唔好又要去熱帶地方,真係要帶定食開嘅腸胃藥。   正露丸可能係唔少「雀仔肚」朋友嘅心水,但係陣味真係好勁,頂唔順的話可能未止痾先要止嘔。   正露丸日本官方twitter最近就出post,回答一個關於味道嘅問題︰

佢地客戶服務部成日收到求助,話擺正露丸喺行李度嗰陣冇扭實個蓋,結果搞到啲衫同個喼都一陣味,問可以點解救。   點知,連服務周到嘅日本人都考起,官方回應話︰冇方法。   但係都有溫韾提示,就係如果物件唔可以洗的話,唯有喺陰涼地方吹風散咁啲味。衣物就最好單獨洗,費事「交叉感染」。仲教路如果唔想有氣味問題,可以帶糖衣裝出外。   網友們都覺得官方回應幾坦白,又就住呢陣味討論,例如聞到就覺得肚痛都好返一半,甚至想要正露丸香水!   人地話嗅覺嘅記憶好持久,究竟喺香港,呢陣味定係首廣告歌深入民心啲呢?原文傳送門