【毀壞文物?】北京女子揸車入故宮晒命 原來大把人咁做

北京故宮係國寶級歷史景點,一磚一瓦都彌足珍貴,由於年代久遠,紫禁城內係禁止車輛駛入,以免壓壞地磚,亦因為文化尊嚴。即使外國元首參觀,都只可以徒步或者坐電動車。而修復文物專家,都係喺故宮步行或者踩單車出入。   不過近日內地微博就有位京城女子「露小寶LL」發帖,大晒喺紫禁城休館日,揸住benz越野車,直入宮中太和門廣場。出完帖有人質疑「露小寶LL」係咪啱規矩,佢仲寸人係咪唔抵得。轉頭佢再解釋,佢身處嘅係故宮西華門停車場, 嗰度係可以揸車進入,亦唔係得佢一個咁做,旁邊十幾輛車。當日佢只係想睇展覽,點知冇開,於是影張相打個卡,強調係合規合法。   話雖如此,事件曝光後,「露小寶LL」好快就刪晒自己十年來嘅微博帖文,而佢本身有嘅「中國國際航空有限公司乘務員」微博認證都消失埋。但係眼明手快嘅網友好快就cap圖兼起底,原來「露小寶LL」成日喺微博炫富,大晒名錶靚袋私人飛機,住喺北京朝陽區豪宅,喺網上好活躍。要佢一夜之間收起所有帖文,可能佢都知件事大劑。中國國際航空亦都澄清,「露小寶LL」前年已經離職。

至於故宮博物館都喺微博發聲明道歉,不過網友似乎唔多收貨,認為放車入宮嘅職員都要問責,而且館方亦冇交代地磚有冇損壞。

呢件事之後,網友又掘到好多人都試過揸車入故宮,再放上網炫耀。

亦有人申冤話,拎到批准先揸車入宮份加活動,而且去停車場先要穿過神武門進入。

事件大到連人民日報都要出post發表立場,「故宮不是開越野的場所,更不是撒野之地……故宮,不容碾壓!」