毅行者支援隊生人霸死地 樂施會出post呼籲「顧及他人」

19+

 

「山屆盛事」毅行者將會喺11月16日舉行。

越來越多人挑戰呢個100公里挑戰,好似身邊總有一個毅行者咁。

 

人多,唔止手腳亂,問題都多。

 

網友Echo Shek就寫咗參加毅行者所見嘅不快經歷,

個post仲被主辦單位樂施會嘅毅行者facebook專頁轉載。

 

原post主已經第18年參與呢個活動,多年來都係支援,

佢話近年喺補給站出現一啲聲稱要支援十幾隊參加者嘅支援隊,仲長期佔去最佳位置。

例如水浪窩check point近廁所較平坦嘅地方,好適合俾行完一日嘅參加者攤抖,

但係一早就被呢啲大規模支援隊霸咗,

仲係用嚟放置物資,同set枱俾佢地嘅隊友開餐。

原post表示,現場當然有更多地方俾隊員休息,

但係最佳位置被用作擺物資同枱,自然令其他人有所不便。

另外,城門郊野公園一個有蓋的涼亭,毅行者期間亦被一個團體佔用。

原post曾經見到涼亭入面無人,開口問佔用者俾個地方休息但被拒絕,

對方仲大大聲話「我哋support十幾隊」。

 

樂施會亦都表示,留意到近年參加者喺支援點嘅不快經歷,

亦發覺這情況日趨嚴重,

所以「希望各參加者及支援隊伍能本著包容、體諒及互助的精神,

好好地與隊友享受100公里的同時,也能顧及他人的需要和感受」。

 

亦都有人留言講咗其他自私行為,

例如入夜之後,為咗辨認到達支援站嘅參加者,

支援隊成員會用電筒逐個跑手照射去辨認自己人,方便影相打氣,

但係好多人因為咁突然閃一閃睇唔到路而仆親。

又或者係比賽前,操山嘅參加者喺山徑上要其他途人讓路,仲開聲鬧人。

 

活動有冇變質?冇呀!

本身目的係以艱苦體驗了解貧困人士嘅苦況,再以捐款支持弱勢社群。

而家「艱苦體驗」呢part,唔止係行得有幾辛苦,

仲可以親身感受資源被少數人佔用、土地問題、無理霸權、有冤無路訴呢啲社會問題添。

 

最後,我幾認同以下留言嘅做法-

有心行,搵日自己同朋友行,再捐錢比樂施會吧。

原post傳送門

【相關搜尋】香港人自私行為

其他內容