氣溫反常 巴西聖保羅錄得史上第二高溫記錄
香港踏入10月,中秋已過但大家依然短衫短褲出街,行一陣都出晒汗,高溫似乎未有隨夏天離開而跟隨完結。另一邊廂南半球呢個時間正係冬天完結入春季節,但居然同樣遇著高溫效應。
巴西聖保羅市近日更錄得37.4度,創下本年度最高溫度,同時係聖保羅市有史以來第二高溫記錄!熱浪一路伸延至南部及中西部,部分城市氣溫竟然高達44度,比夏天更為炎熱!
據氣象學家所言,因為阿根廷中部及巴西南部嘅南大河州部分地區大氣高層出現強風關係,導致冷空氣未能吹入巴西東南部及中西部,令巴西出現反常高溫。其實自2000年以嚟,巴西聖保羅市春天氣溫一年比一年高,其他城市例如里約熱內盧等亦有相同情況,冬天亦變得愈來愈短。不過唔使去到巴西,大家望一望身處嘅香港又何嘗唔係一樣,幾乎只剩下夏天及冬天,秋天、春天完全無感。長此下去唔單止居民難受,亦好影響大自然生態,好多動植物都會被氣溫改變而導致滅絕!
相關文章: