江嘉敏獲高層照住 洗底爭做女一

東方日報
·3 分鐘文章
江嘉敏打扮漸趨成熟,早前谷胸示人,令人眼前一亮。
江嘉敏打扮漸趨成熟,早前谷胸示人,令人眼前一亮。

江嘉敏之前負面新聞不少,既與「好姊妹」馮盈盈上遊艇弄致鬧翻收場,又被指專埋有錢人堆做「拜金女」,不過勝在好戲的她備受無綫重用,一劇接一劇,她經高層訓話後亦決心「洗底」,撇甩「港女」形象,專心演戲、工作,望由小花升呢花旦之位。

現年26歲的江嘉敏入行後一直以「妹妹仔」形象示人,不過之前負面新聞不斷的她,與馮盈盈上遊艇玩出火擘面,之後一時被指拜金,一時又被指姣溝男友兄弟,雖然形象受損,但她都沒有自暴自棄,日前更絕地反擊,指舊聞再被翻炒,叫某些有心人不要再消費她。而無綫現時可以登上一線花旦之位的小花不多,陳曉華被指戲屎、劉穎鏇又未成熟,據知無綫方面都非常看重嘉敏,她經高層「照肺」後,誓要撇甩港女Feel,向「女一」進發。而她今年亦憑劇集《大醬園》、《殺手》及《過街英雄》爭無綫頒獎禮「飛躍進步女藝員」。

由內到外「改造」

早兩日適逢聖誕前夕,見嘉敏獨自於銅鑼灣逛商場。不過她似乎真的決心「轉型」,見她的衣着漸趨成熟,繼早前台慶夜谷胸示人後,日前亦學人晒女人味,以短褲配襯長Boot、腰間束Belt,輕輕露出白滑長腿,顯得又高又瘦,縱使戴了口罩,都不時有人眼望望。當日只見她主攻護膚品,行完一間又一間,試完產品後成功有收穫。行經賣少女精品的舖頭時,她看完水晶手鏈,又拿着耳環左拼右拼,認真貪靚!最後她走進書局,在心理學書架左挑右選,看來真的想由內至外重新「改造」。

大挑戰唔易做

事後致電給她,問到當日是否要買聖誕禮物給男友?她笑說:「一半一半啦!其實我之後要開套新劇,劇入面我要做個18歲嘅KOL,呢排美容院去唔到,所以自己要狂做Facial。(見你都買咗啲護膚產品?)係呀!希望拍出嚟個樣後生啲,唔會咁多紋,我真係好勤力,加上依家咁凍,天氣又乾燥,所以趁開拍前做得幾多得幾多,18歲真係一個大挑戰,唔易做o架!」

談到她去書局買心理學書籍,她直言:「我個角色係有反社會人格,因為現實生活中身邊冇呢類朋友,所以要喺電影同書籍上面攞靈感,自己仲揣摩緊角色,最近有啲韓劇都有講反社會人格,不過角色人物設計同個程度去到邊就未知,只可以睇定多啲做功課,做多啲唔同嘅角色都好,唔好一味做學生妹,要我做港女。」

江嘉敏到書局睇書,一雙美腿非常搶Fo!
江嘉敏到書局睇書,一雙美腿非常搶Fo!
江嘉敏買護膚品,女仔係貪靚啲嘅!
江嘉敏買護膚品,女仔係貪靚啲嘅!
拿着耳環左拼右拼!
拿着耳環左拼右拼!