江嘉敏高處墮下 搵謝東閔墊底

無綫小花江嘉敏與謝東閔日前於中環拍攝無綫新劇，當日嘉敏牙痛、頭痛兼肚瀉，依然頂硬上捱通頂！拍攝期間，她要擒高兼墮下，撻在謝東閔身上。看似活力十足，但鏡頭背後她是「攣弓蝦米」，不停搽藥油及搓肚，我見猶憐。

現忙拍無綫劇《黯夜守護者》的江嘉敏，日前晚上跟拍檔謝東閔到蘭桂坊拍外景。劇情講述演KOL的江嘉敏於後巷爬高搜證，怎料撞正謝東閔放狗，狗仔突然狂吠，嚇得她從高處墮下，整個人撻在男方身上。拍攝期間，她不停大叫「好驚」，謝東閔表示：「冇事嘅，你信唔信我先？我托住你，有事都係我有事先啦！」場面搞笑。

唔敢剝牙怕面腫

嘉敏受訪時透露之後還會有不少動作場面，更有被強姦戲份，故今次「擒高撻低」屬小兒科。又自爆帶病上陣，新年流流病痛纏身：「我隻智慧齒之前都痛過，睇咗牙醫，佢話壓住條神經線，加上我怕依家剝會面腫，連唔到戲，惟有食止痛藥，等拍完先剝。就係因為牙痛，搞到頭好痛，尋晚亦屙咗好多次，依家仲絞肚痛。」

提到之前是非纏身，她笑言不會「打小人」，反而想拜神，祈求身體健康。記者指她比之前清減不少，她表示：「我怕肥，今年一舊年糕都冇食。（初三情人節點慶祝？）赤口喎！我好多情侶朋友嗰日見面都鬧交，所以我返媽咪屋企，同家人一齊過。」

現實生活中有養狗的謝東閔，坦言平時甚少放狗，笑指愛犬比他更活躍。提到何哲圖離開星夢，身為旗下歌手的他坦言現時以拍劇為主：「做好自己分內事，唱歌方面都想同其他人合作，希望有新嘗試。」