江美儀自爆當年秘婚原因「留返樣嘢係屬於我地兩個」 吳家樂結婚被爆多得陳奕迅？

江美儀同吳家樂主持網上娛樂節目《娛樂好好玩》，不時大爆圈中猛料，估唔到早前一集，江美儀同吳家樂都要自爆埋一份，一個講點解秘婚唔認，一個講點解註冊結婚俾人知。

江美儀同吳君如細佬吳君祥曾經相愛多年，但於2018年被爆已分手，後來更再被揭江美儀同吳君祥秘婚多年。江美儀節目中提到藝人係咪有必要事事事同外界分享時，以自己當年秘婚做例子，解釋純粹因為唔想講而冇公開婚訊。「因為我覺得做藝人呢，我已經要乜嘢都畀人知。我行出門口，乜嘢都反晒出嚟咩都畀人講。我淨係想有一樣嘢，我係想保持住，我唔講㗎啫。我留返一樣嘢係屬於我哋兩個，係我哋兩個嘅，我唔想畀人知」。而當年秘婚消息之所以獲証實，除咗因為娛記搵到文件證明﹐後來記者向吳君祥爸爸夏春秋，冬叔不虞有詐而爆料。

吳家樂隨後提到18年前同太太周蕙蕙入紙結婚嗰排，有消息指陳奕迅同徐濠縈申請結婚，娛記於是到婚姻註冊處查閱新人結婚申請紀錄，無意中發現吳家樂原來秘密拍拖兼準備結婚。之後吳家樂自言成為狗仔隊追訪目標，連家人都受牽連，外父同爸爸都被狗仔隊滋擾。家樂話有次試過被狗仔隊跟蹤，後來佢揸車去到交通繁忙嘅公主道，狗仔隊竟然將車「閘住」家樂架車，上前同家樂講「有冇嘢講？我今日冇料喎」。家樂話只好報警處理，更提到千祈唔好同狗仔隊有衝突，因為記者旁邊一定有攝記拍緊片。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！