汪明荃懷念拍檔:老人家病都冇辦法!

東方日報
·2 分鐘文章

李香琴人緣甚佳,於影壇、電視界相識滿天下,不少後輩曾獲其提攜,得知其死訊大感可惜。

汪明荃:

大家合作過唔少大型節目同劇集,知佢之前都開始唔記得嘢,以為佢身體唔太差,但今日突然間聽到消息……咁老人家病都冇辦法,希望佢個女同啲孫呀都保重,好懷念佢。

黎諾懿:

同琴姐合作係《溏心風暴》,佢係非常之好嘅長輩,有佢喺度係非常之開心,真係好錫我哋啲後輩,佢雖然唔喺度,但佢嘅精神會帶畀我哋,話畀我哋聽永遠都要開心。

陳敏之:

2010年琴姐喺《公主嫁到》飾演金太夫人,好好人,和藹可親,個性幽默,好肯提攜後輩,係一個非常值得尊敬嘅前輩,希望佢一路好走。

古天樂:

佢係個好好嘅前輩,提攜所有嘅後輩。佢嘅離開我覺得相當惋惜,希望佢家人節哀。

黃百鳴:

我哋自《八星報喜》開始合作,每部賀歲片都自然會想到搵佢參興,之後佢身體唔好,唔係好行到都有同古天樂探佢同佢飲茶,所以收到佢走咗嘅消息,好唔舒服。

任達華:

我哋相識於1977年《家變》,佢係好好嘅長輩,今日知道佢離開,個心都好唔舒服,我覺得佢永遠都係陪伴大家、陪伴我。以前好多時都會同佢、炳哥(譚炳文)去食飯同出席慈善活動,希望佢家人節哀。

胡楓:

心情好悲痛,我哋識咗60幾年,阿炳(譚炳文)又係,我都唔知點講,佢當年多數做鍾意我嘅女人,佢又靚又肯做反派,好多導演鍾意用佢。

薛家燕:

好耐之前都睇過佢,嗰陣時佢都OK,仲同我講自己有練歌,仲話之後一齊去登台。琴姐,好想念佢,佢係非常好嘅前輩。